Մասնագետները իմունաթերապիայի նոր մեթոդներ են մշակում տուբերկուլյոզի դեմ պայքարելու համար

Փորձագետներն աշխատում են իմունաթերապիայի նոր մեթոդների ստեղծման ուղղությամբ, որպեսզի օգտագործեն օրգանիզմի սեփական իմունային համակարգը տուբերկուլյոզի դեմ պայքարելու համար՝ հուսալով, որ դրանք կկարողանան հաղթահարել հիվանդության անգամ դեղակայուն ձևերը: Բարսելոնում ESCMID Համաշխարհային Կոնգրեսում ունեցած իր ելույթում Կարոլինյի ինստիտուտի ինֆեկցիոն բժշկության կենտրոնի (CIM) աշխատակից, դոցենտ Սյուզաննա Բրիգենտին ներկայացրել է այս ոլորտում գիտնականների համատեղ ջանքերով իրականացվող աշխատանքը, գրում է Medical Xpress-ը։

Տվյալների համաձայն, 2022 թվականին ամբողջ աշխարհում առաջին անգամ տուբերկուլյոզի ախտորոշում ստացածների թիվը կազմել է 7,5 միլիոն մարդ, ինչը հանգեցրել է մոտ 1,3 միլիոն մահվան: Ըստ գնահատականի, հիվանդության  410,000 և մահվան 160,000 դեպքերը տեղի են ունեցել  բազմադեղորայքակայուն (MDR) տուբերկուլյոզի պատճառով:

«Տուբերկուլյոզի միկոմանրէները (Mtb) զարգացրել են մարդու իմունային պատասխանը մանիպուլյացիայի ենթարկելու և իմունային բջիջների հակամանրէային էֆեկտոր գործառույթները խաթարելու զարմանալի կարողություն, - պարզաբանել է դոցենտ Բրիգենտին:- Չնայած հակամանրէային թերապիայի որոշ նոր մեթոդների ի հայտ գալուն, հակաբիոտիկային բուժումը մնում է ինտենսիվ և երկարատև գործընթաց, նույնիսկ հիվանդության դեղորայքազգայուն ձևերի դեպքում: Կարևոր է նշել, որ հակաբիոտիկների դիմադրության հանգեցնող մուտացիաները միկոմանրէների անբաժանելի հատկություններն են, որոնք արդյունավետորեն կայունություն են զարգացնում  հակաբիոտիկների ինչպես հին, այնպես էլ նոր խմբերի նկատմամբ, ինչը կարևորում է բուժման  լրացուցիչ մեթոդների անհրաժեշտությունը: Այսպիսով, բուժման նոր մեթոդներ անվերապահորեն անհրաժեշտ կլինեն տուբերկուլյոզի դեմ պայքարում»։

Նոր թերապիան նպատակ ունի ուժեղացնել օրգանիզմի իմունային արձագանքը և ներկայացնում է տուբերկուլյոզի, հատկապես բազմադեղորայքակայուն տուբերկուլյոզի բուժումը բարելավելու չուսումնասիրված հնարավորություն: Թերապիաները նախատեսված են վարակված բջիջներում մի քանի իմունային ուղիների վրա ներգործելու համար՝ մանրէների աճը ուղղակիորեն ճնշելու փոխարեն հակամանրէային ֆունկցիաների վերականգնման կամ ներմուծման նպատակով։  

Հետևեք NEWS.am Medicine-ին Facebook-ում և Twitter-ում