Դաշտանադադարի փուլում տեստոստերոնը թույլ ազդեցությո՞ւն ունի կնոջ սեռական «դրայվի» վրա

Էստրոգենն ու տեստոստերոնը կարող են որոշակիորեն դաշտանադադարի փուլում գտնվող կնոջ սեռական «դրայվի» եւ սովորույթների վրա անդրադառնալ, սակայն, ինչպես շուրջ մեկ տասնամյակ տեւած հետազոտության արդյունքում է վերջերս պարզվել, հարաբերություններն ու էմոցիոնալ առողջությունը տվյալ հարցում շատ ավելի մեծ դերակատարում են ապահովում, հաղորդում է FoxNews-ը:

«Թեեւ նախընթաց մի շարք հետազոտությունների շրջանակում վկայություններ են ձեռք բերվել առ այն, որ տեստոստերոնի եւ այլ վերարտադրողական հորմոնների ու կնոջ ցանկությունների եւ մաստուրբացիայի հաճախականության միջեւ որոշակի կապ է գործում, սույն լայնածավալ ուսումնասիրությամբ սեռական գործառույթի բազմաթիվ ասպեկտների վրա հոգեբանական գործոնների ազդեցության շատ ավելի մեծ կարեւորությունն է վեր հանվում: Կնոջ էմոցիոնալ բարեկեցությունը եւ ինտիմ հարաբերությունների որակը վիթխարի նշանակություն ունեն՝ սեռական առողջության համար», - մեկնաբանել է հետազոտության հեղինակ դոկտոր Ջոն Ռանդոլֆը՝ Միչիգանի բժշկական համալսարանից:

Ձեռք բերված բացահայտումները կարող են ստվեր նետել տեստոստերոնային թերապիայի արդյունավետության վրա, որը հատկապես հեռացված ձվարաններով կանանց սեռական գործառույթի բարելավման նպատակով է նշանակվում:

Journal of Clinical Endocrinology & Metabolism ամսագրում նկարագրություն գտած հետազոտության հեղինակները, մասնավորապես, դաշտանադադարային անցման փուլում գտնվող կանանց մոտ վերարտադրողական հորմոնների եւ սեռական գործառույթի միջեւ կապն են ուսումնասիրել: Բացի 3 300 մասնակիցների շրջանում կազմակերպված հարզախույզից, որի ընթացքում տվյալներ են հավաքագրվել՝ կանանց սեռական ցանկությունների եւ ակտիվության վերաբերյալ, գիտնականները նաեւ արյան նմուշներ են ձեռք բերել՝ համարժեք հորմոնային ֆոնը պարզելու նպատակով:

Գիտնականների ուշադրության կենտրոնում հատկապես դեհիդրոէպիանդրոստերոնի սուլֆատ (DHEAS) անվամբ հայտնի հորմոնն է հայտնվել, որը տեստոստերոնի, էստրոգենի տեսակներից մեկի՝ էստրադիոլի եւ ֆոլիկուլ խթանող հորմոնի (FSH) վերածվելու հատկություն ունի: Փորձագետների հավաստիացմամբ, դաշտանադադարն առավելապես FSH-ի մակարդակի աճով է զուգորդվում:

Գիտնականները նաեւ հաստատումն են գտել այն տեսության, որ բնականորեն տեստոստերոնի, ինչպես նաեւ դրա նախորդը հանդիսացող DHEAS-ի բարձր մակարդակ ունեցող կանայք առավել հաճախ են սեռական ցանկություններ ունենում: Այդուհանդերձ, դոկտոր Ռանդոլֆի մեկնաբանմամբ, խնդրո առարկա ազդեցությունը բավականին համեստ բնույթ է կրում: Մյուս կողմից էլ բավարարվածությունը՝ առկա սեռական հարաբերություններից, կարող է գործառույթի անհամեմատ ավելի բարեկարգ վիճակում պահպանման հանգեցնել:

«Այնպես որ, դաշտանադադարային փուլում գտնվող՝ իրենց սեռական գործառույթից դժգոհ կանայք մասնագետի հետ բուժման տարբերակները քննարկելիս ոչ-հորմոնային գործոնների ազդեցության վարկածը եւս պետք է առաջ քաշեն», - խորհուրդ է տալիս հետազոտության հեղինակը:

Հետևեք NEWS.am Medicine-ին Facebook-ում և Twitter-ում