Հայաստանում եւ Վրաստանում ավելի լավ է չհիվանդանալ

International SOS կազմակերպությունը հրապարակել է այն երկրների քարտեզը, որտեղ առողջապահական համակարգը հեռու է բավարար լինելուց եւ որտեղ ավելի լավ է այդ համակարգի ծառայությունների կարիքը չզգալ:

Կազմակերպության մասնագետները համոզված են, որ քարտեզը օգտակար կլինի ճանապարhորդների համար եւ հնարավորություն կընձեռի գնահատել հնարավոր վտանգները, որոնցով հղի է այս կամ այն երկիր ուղեւորվելը:

Աշխարհի բոլոր երկրները կազմակերպությունը բաժանել է հինգ մասի (սեղմեք նկարի վրա այն մեծացնելու համար).

ՇԱԳԱՆԱԿԱԳՈՒՅՆ

Այս գույնով նշված են զարգացող երկրները, որոնց խոշոր քաղաքներում կարելի է որակյալ բժշկական սպասարկում ստանալ: Այս երկրների խնդիրն այն է, որ ավելի հեռավոր քաղաքներում եւ գյուղերում առողջապահական համակարգը շատ թույլ է զարգացած: Այս երկրների շարքին են դասվել Ռուսաստանը, Չինաստանը, Հնդկաստանը, Իրանը, Ղազախստանը եւ մի շարք այլ երկրներ:

ԿԱՆԱՉ

Կանաչ գույնով են քարտեզի վրա նշված այն երկրները, որտեղ կարելի է հանգիստ հիվանդանալ: Բժշկական ծառայությունների որակը այստեղ շատ բարձր է, համապատասխանում է միջազգային չափանիշներին, դեղորայքի հետ էլ խնդիրներ սովորաբար չեն լինում: Բացի այդ՝ ինֆեկցիոն հիվանդությամբ վարակվելու հավանականությունը այս երկրներում շատ ցածր է: «Կանաչ» այս երկրներն են Կանադան, ԱՄՆ-ն, մի շարք եվրոպական երկրներ, Ավստրալիան, Ճապոնիան:

ԴԵՂԻՆ

Դեղինով են նշված վտանգավոր երկրները: Այստեղ կան կլինիկաներ, որոնք միջազգային չափանիշներին համապատասխանող բուժում են առաջարկում, բայց կան նաեւ այնպիսիք, որոնց մատուցած ծառայությունների որակը բավականին ցածր մակարդակի վրա է:  Այստեղ առկա է նաեւ ինֆեկցիոն հիվանդություններ ձեռք բերելու հավանականությունը՝ մասնավորապես խմելու ջրի միջոցով: Կազմակերպության մասնագետները այս շարքին են դասել Թուրքիան, Սաուդյան Արաբիան, որոշ եվրոպական երկրներ, Թայլանդը, Հարավային Կորեան, ինչպես նաեւ Լատինական Ամերիկայի մի շարք երկրներ:

ԳԱԶԱՐԱԳՈՒՅՆ

«Գազարագույն» երկրների շարքին են դասված հատկապես վտանգավոր երկրները: Բժշկական ծառայությունների որակը այստեղ այնքան էլ լավը չէ, որոշ կարեւոր դեղեր շատ դժվար է գտնել, իսկ երբեմն էլ դրանք պահպանվում են ոչ պատշաճ պայմաններում: Բացի այդ՝ այս երկրներում շատ բարձր է որեւէ ինֆեկցիոն հիվանդությամբ վարակվելու վտանգը: Այդ երկրներն են Հայաստանը, Վրաստանը, Բելառուսը, Մոնղոլիան, մի շարք ասիական եւ աֆրիկյան երկրներ:

ԿԱՐՄԻՐ

Կարմիր գույնով կազմակերպության մասնագետները քարտեզի վրա նշել են ծայրաստիճան վտանգավոր երկրները, որտեղ բժշկական օգնություն ստանալ, ամենայն հավանականությամբ, չի հաջողվի նորմալ կլինիկաների բացակայության կամ շատ բարձր գների պատճառով: Որակյալ դեղերն այստեղ գրեթե բացակայում են, իսկ ինֆեկցիաները շատ են: «Կարմիր» ցուցակում ընդգրկվել են Հյուսիսային Կորեան, Սիրան, Իրաքը եւ Աֆղանստանը: 

Հետևեք NEWS.am Medicine-ին Facebook-ում և Twitter-ում