Բազմոցի վրա նույնիսկ մեկ ավելորդ ժամը կարող է դիաբետի հանգեցնել

Բազմոցին անցկացվող ամեն ավելորդ ժամը  20 տոկոսով մեծացնում է դիաբետի ռիսկը: Նիդերլանդների Մաաստրիխտի համալսարանի գիտնականները, որոնք նման եզրակացության են հանգել, նկատել են, որ երկրորդ տեսակի դիաբետի զոհերը բազկաթոռներին եւ բազմոցներին ծախսում են իրենց ժամանակի զգալիորեն ավելի մեծ մասը, քան նրանք, ով այդ հիվանդությունը չունի:   

Դիաբետից տառապող մարդիկ ամեն օր միջինը 26 րոպե ավելի երկար են անցկացնում նստած դիրքում (օրինակ` համակարգչի մոտ) նրանց համեմատ, ովքեր գլյուկոզայի նորմալ նյութափոխանակություն ունեն: Ընդհանուր առմամբ հետազոտողները չեն ապացուցել, թե նստակյաց կյանքն ինքնին դիաբետ է առաջացնում:  Լիովին հնարավոր է, որ դիաբետի զոհերը պակաս ակտիվ են:

Հոլանդացի գիտնականների հետազոտությանն ավելի քան  2 400 մարդ է մասնակցել: Նրանցից յուրաքանչյուրն արագաչափ էր կրում օրական  24 ժամ`  8 օրվա ընթացքում շարժումների ծավալը չափելու համար: Հետազոտողներն ուսումնասիրել են ժամանակի այն քանակությունը, որ մարդիկ անցկացրել են նստած դիրքում, հանգստի ընդմիջումների քանակը, երկարատեւ   (ավելի քան 30 րոպե) ընդմիջումների քանակը եւ այլն:

Յուրաքանչյուր մասնակից նաեւ շաքարի մակարդակի թեստ է հանձնել, ինչը հնարավորություն կտա որոշել նրա դիաբետիկ կարգավիճակը:  Հետազոտության հեղինակները մատնանշում են, որ նստակյաց կյանքը կարող է կարեւոր դեր խաղալ երկրորդ տեսակի դիաբետի զարգացման գործում` անկախ բարձր ինտենսիվություն ունեցող ֆիզիկական ծանրաբեռնվածությունից:

Հետևեք NEWS.am Medicine-ին Facebook-ում և Twitter-ում