Ամբողջ օրը մի նստեք աշխատավայրում

Մեզնից շատերն աշխատավայրում ամբողջ օրը նստած են անցկացնում: Դրան ավելացրեք նաեւ այն նստակյաց ժամերը, որ մենք անցկացնում ենք տանը, եւ ստացվում է, որ նստած անցկացնում ենք մոտ 13 ժամ:

Ավստրալիայում Սաքսի ինստիտուտի հետազոտողները պարզել են, որ այն մարդիկ, ովքեր օրական 11 ժամից ավել են նստում, առաջիկա 3 տարում մահանալու ռիսկին 40%-ով ավելի են ենթակա, քան նրանք, ովքեր օրական 4 ժամից պակաս են նստում:

Նախորդ հետազոտությունները եւս ցույց են տվել, որ նստակյաց կենսակերպը կապված է սրտային հիվանդությունների, դիաբետի եւ քաղցկեղային հիվանդությունների մի քանի տեսակների հետ: Երկար ժամանակ նստելը եւ դրա ֆիզիոլոգիական կամ մետաբոլիկ ազդեցությունը մարդու օրգանիզմի վրա ստացել է «նստակյաց հիվանդություն» անունը:

«Բացի սրտի հետ կապված խնդիրներից՝ նստակյաց կենսակերպի պատճառով որովայնային եւ նստատեղի ապաճման կամ թերզարգացածության հետեւանքով կարող են ցավեր առաջանալ պարանոցի եւ մեջքի շրջանում»,- FoxNews.com-ի հետ զրույցում ասել է Նյու Յորքի հատուկ վիրաբուժության հիվանդանոցի ֆիզիոթերապեւտ Էլիս Չենը:

Այս վատ սովորությունից ազատվելու համար բժիշկները խորհուրդ են տալիս ֆիզիկապես ակտիվ լինել նույնիսկ աշխատավայրում: «Ես իմ հիվանդներին խորհուրդ եմ տալիս ժամը մեկ վեր կենալ աթոռից: Կարելի է գնալ գործընկերոջը հարց տալու համար կամ մոտենալ ջրի սարքին, նաեւ ցանկալի է աստիճաններով բարձրանալ»,- ասում է Չենը:

TechnoGym միջազգային ֆիթնես-ընկերությունը վերջերս ներկայացրեց իր նոր արտադրանքը՝ Wellness ֆիթբոլը, որը կարելի է օգտագործել նաեւ աշխատավայրում: Գնդի ներքեւի կեսը ծանր է վերեւինից, ինչն այն ավելի հարմարավետ է դարձնում: Ի տարբերություն կոշտ աթոռների՝ ֆիթբոլը կայուն չէ, ինչը ձեռքերին եւ ոտքերին ստիպում է աշխատել, որպեսզի նստած ժամանակ չճոճվել:

«Wellness ֆիթբոլը մկաններին ակամա աշխատել ստիպելու լավագույն միջոցներից է, ինչն էլ մարդուն ստիպում է ուղիղ նստել եւ պահել ճիշտ կեցվածքը»,- FoxNews.com-ին տված հարցազրույցում ասել է հայտնի մարզիչ Ջոշ Հոլլանդը:

Wellness ֆիթբոլը վաճառվում է QR կոդով՝ հատուկ գնդակի համար մշակված վարժությունների տեսագրության համար: Հոլլանդի մշակած այդ վարժությունները կարելի է փորձել եւ մարզադահլիճում, եւ աշխատավայրում՝ նստելով ֆիտբոլի վրա:

Ազդրերի շարժում՝ նստեք գնդի վրա եւ այն ազդրերով ու հետույքով շրջանաձեւ շարժումներով շարժեք (գլուխը, ուսերը եւ պարանոցը պետք է անշարժ լինեն): Հետո վարժությունը հակառակ ուղղությամբ արեք: Դուք պետք է զգաք, թե ինչպես է աշխատում ամբողջ մարմինը՝ որովայնի հետին եւ առաջնային մկանները եւ մեջքը:

Որովայնի ձգում՝ այս վարժության ժամանակ շարժումներ չկան, պետք է պարզապես ակտիվորեն սեղմել եւ թուլացնել բոլոր մկանները: Ոտքերով հենվեք հատակին եւ ակտիվորեն աշխատեք՝ սեղմելով եւ թուլացնելով ծնկատակի եւ հետույքի ջլերը եւ որովայնի մկանները: Սեղմեք բոլորն ու տեսեք, թե որքան կկարողանաք մնալ այդպես:

Կքանստումներ՝ կանգնեք ուղիղ՝ գունդն առաջ պարզած ձեռքերում պահելով: Սեղմեք գունդը: Գնդի քաշը մոտ 2.5 կգ է, ուստի կզգաք, թե ինչպես կգործեն Ձեր ձեռքերը ու կրծավանդակը: Մեջքն ուղիղ պահեք եւ կքանստումներ արեք: Կրկնեք 5-10 անգամ:

Հենման վարժություններ՝ Ձեռքերով եւ նախաբազուկներով հենվեք գնդի վրա: Ոտքերը թեթեւ առաջ ձգեք: Բարձրացրեք հետույքը, սեղմեք որովայնի մկանները եւ պահեք 10 րոպե:

Հետևեք NEWS.am Medicine-ին Facebook-ում և Twitter-ում