Բջջանյութով հարուստ սննդակարգը պաշտպանում է հաստ աղու քաղցկեղից, սակայն միայն որոշակի աղիքային բակտերիաների առկայության դեպքում: Հետազոտողներն այսպիսի եզրակացություն են արել մկների վրա կատարված փորձերից հետո:
Մկներին կեր են տվել՝ կամ բջջանյութի շատ պարունակությամբ, կամ քիչ, երբ որոշ մկների մոտ աղիներում առկա է եղել բակտերիա, որը բջջանյութը վերածում է բուտիրատ քիմիական նյութի: Այնուհետեւ առանց բացառության բոլոր մկներին քաղցկեղ առաջացնող քիմիական նյութ են տվել, հաղորդում է Fox News-ը:
Բջջանյութի մեծ քանակությամբ կեր ստացած եւ աղիներում բուտիրատ արտադրող բակտերիայի առկայությամբ մկների մոտ ուռուցքների քանակությունը 75%-ով ցածր է եղել: Սակայն ինքն իրենով բջջանյութի մեծ քանակություն պարունակող դիետան՝ առանց բուտիրատ արտադրող բակտերիաների չի պաշտպանում հաստ աղու քաղցկեղից: Չի պաշտպանում քաղցկեղից նաեւ բջջանյութի քիչ պարունակությամբ դիետան՝ բուտիրատ արտադրող բակտերիաների առակայության դեպքում:
Հետազոտողները նշել են, որ առողջ հաստ աղու բջիջները բուտիրատը որպես «վառելիք» են օգտագործում, այնինչ քաղցկեղային բջիջները բուտիրատի փոխարեն շաքարի մեջ առկա գլյուկոզան են օգտագործում: Քանի որ քաղցկեղային բջիջները բուտիրատ չեն օգտագործում, քիմիական նյութը բջիջներն իր մեջ է հավաքում, ինչը կարող է բերել նրանց ոչնչացման, ասել է Հյուսիսային Քարոլինայի համալսարանի դոցենտ Սքոթ Բուտմանը, որը ներկայացրել է աշխատանքը Քաղցկեղի հետազոտման ամերիկյան ասոցիացիայի նիստին:
Հետևեք NEWS.am Medicine-ին Facebook-ում և Twitter-ում