Հաճախակի եւ կանոնավոր կերպով շոգեբաղնիք այցելելու դեպքում ուղեղի կաթվածի վտանգը նվազում է: Այս եզրահանգմանն են եկել Բրիտանիայի Բրիստոլի եւ ֆիննական Յայուվյասկյուլի համալսարանի գիտնականները:
Ավելի վաղ արդեն հաջողվել էր պարզել, որ շոգեբաղնիք այցելություններն ընդհանուր առմամբ օգտակար են մարդու սրտանոթային համակարգի համար, սակայն տվյալ դեպքում գիտնականները կենտրոնացել են կոնկրետ խնդրի վրա՝ ուղեղի կաթվածի: Ինչպես նաեւ փորձ է արվել պարզելու, որքանով է ազդեցությունը կախված շոգեբաղնիք այցելությունների քանակից:
Մասնագետները հետազոտության համար հրավիրել են 53-ից մինչեւ 74 տարեկան 1628 մարդու: Յուրաքանչյուր կամավորի հարցրել են՝ որքան հաճախ է նա այցելում ավանդական ֆիննական բաղնիք (oդի խոնավությունը այստեղ 10-ից 20 տոկոս է): Դրանից հետո մասնակիցներին բաժանել են 3 խմբի: Առաջին խումբը շոգեբաղնիք է այցելել շաբաթական մեկ անգամից ոչ ավել, երկրոդը՝ 2-3 անգամ, իսկ երրորդը՝ 4-7 անգամ: Յուրաքանչյուր մասնակցին միջինում 15 տարի հետեւել են: Այդ ընթացքում կաթվածի 155 դեպք է գրանցվել:
Ինչպես նշում են մասնագետները, երկրոդ խմբի ներկայացուցիչների մոտ կաթվածի վտանգը 14 տոկոսով նվազել էր ի տարբերություն առաջին խմբի ներկայացուցիչների: Երրորդ խմբում կաթվածի հավանականությունը 61 տոկոսով էր նվազել:
Նման արդյունքը գրանցվել է ինչպես տղամարդկանց, այնպես էլ կանանց մոտ: Շոգեբաղնիք հաճախակի այցելությունների եւ կաթվածի վտանգի նվազեցումը նկատվել է նաեւ երբ գիտնականները «ուղղումներ են արել» մասնակիցների տարիքում, սեռում, վնասակար սովորություններում:
Հետազոտությունը հրապարակվել է Neurology ամսագրում:
Հետևեք NEWS.am Medicine-ին Facebook-ում և Twitter-ում