Մոտ 1,8 միլիոն ապահովագրված. ամփոփվել են առողջության համընդհանուր ապահովագրության առաջին կիսամյակի արդյունքները

Առողջության համընդհանուր ապահովագրության համակարգի ներդրումից ի վեր Հայաստանում ապահովագրված քաղաքացիների թիվն անշեղորեն աճում է։ 2026 թվականի հունիսի տվյալներով՝ ծրագրի մասնակիցների թիվը հասել է շուրջ 1,8 միլիոնի, ինչը մոտ 14%-ով գերազանցում է տարեսկզբի սպասելիքները։ Ընդ որում, ապահովագրվածներից գրեթե ամեն երկրորդն արդեն օգտվել է համակարգով նախատեսված բժշկական ծառայություններից։ Այս մասին հայտնել է Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը՝ ներկայացնելով համակարգի աշխատանքի միջանկյալ արդյունքները։

Ըստ Խարազյանի՝ 2026 թվականի սկզբին նախատեսվում էր, որ տարվա ընթացքում համակարգում կընդգրկվի շուրջ 1,6 միլիոն քաղաքացի։ Սակայն արդեն հունիսին շահառուների թիվը հասել է մոտ 1,8 միլիոնի։ Աճը հիմնականում ապահովել են վարձու աշխատողներն ու անհատ ձեռնարկատերերը։ Հիմնադրամի ղեկավարի խոսքով՝ ցուցանիշներն ավելացել են առաջին հերթին 200 հազար դրամ և ավելի աշխատավարձ ստացող քաղաքացիների հաշվին։ Միայն հունվարին ապահովագրվածների այս խումբն ավելացել է ավելի քան 30%-ով։

Նրա գնահատմամբ՝ նման դինամիկան պայմանավորված է մի քանի գործոնով՝ երկրում պահպանվող տնտեսական աճով, նոր աշխատատեղերի ստեղծմամբ, աշխատավարձերի բարձրացմամբ, ինչպես նաև բուն ապահովագրական համակարգի կարևորության աճով։ Խարազյանն ընդգծել է, որ մասնակիցների թվի ավելացումը փաստում է նաև նոր մոդելի պահանջված լինելու մասին։ Ըստ նրա՝ ապահովագրական փաթեթում ներառված բժշկական ծառայությունների հասանելիությունը շատ քաղաքացիների դրդել է դիմել գործատուներին՝ համակարգում ընդգրկվելու խնդրանքով, իսկ որոշ դեպքերում էլ գործատուներն են ինքնուրույն որոշում կայացրել բարձրացնել աշխատակիցների աշխատավարձը, որպեսզի վերջիններս համապատասխանեն ծրագրի մասնակցության չափանիշներին։

Հունիսի դրությամբ 1,8 միլիոն ապահովագրվածներից փաթեթում ներառված ծառայություններից օգտվել է 762,404 մարդ։ Այսպիսով, համակարգի փաստացի ամեն երկրորդ մասնակիցն արդեն ստացել է ծրագրով նախատեսված առնվազն մեկ բժշկական ծառայություն կամ դեղորայքային ապահովում։ Միայն ապահովագրական փաթեթով դեղորայք ստացել է 35,961 մարդ։ Խարազյանի խոսքով՝ առանց դեղերի արժեքը հաշվի առնելու, բժշկական օգնություն ստացած մեկ անձի միջին ծախսը վերջին ամիսներին կազմել է շուրջ 60 հազար դրամ, իսկ հունիսին հասել է մոտ 61 հազար դրամի։

Ընդ որում, ամսական կտրվածքով համակարգից սկսում է օգտվել շուրջ 50 հազար մարդ, ովքեր նախկինում ընդհանրապես բժշկական օգնություն չեն ստացել պետական ծրագրերով։ Ինչպես նշել է հիմնադրամի ղեկավարը, խոսքը այն քաղաքացիների մասին է, ովքեր մինչ նոր մոդելի ներդրումը չեն օգտվել ո՛չ բժշկական սպասարկման պետական ծրագրերից, ո՛չ էլ արտոնյալ դեղորայքային ապահովման ծրագրերից։ Նրա խոսքով՝ հենց ապահովագրական համակարգի ներդրումն է այս մարդկանց հնարավորություն տվել առաջին անգամ անհրաժեշտ բժշկական ծառայություններ ստանալ։

Խարազյանը հիշեցրել է, որ դեռևս բարեփոխման նախապատրաստական փուլում հիմնական խնդիրներից մեկը համարվում է բժշկական օգնության հասանելիության բարձրացումը։ Տարբեր հետազոտությունների համաձայն՝ Հայաստանի քաղաքացիների ավելի քան 20%-ը ֆինանսական դժվարությունների պատճառով չի դիմել բժշկական օգնության։ Բացի այդ, բնակչության շուրջ 50–60%-ը նախընտրել է զբաղվել ինքնաբուժությամբ, ինչը մեծապես պայմանավորված է եղել մասնագիտական բժշկական օգնություն ստանալու ֆինանսական հնարավորության բացակայությամբ։

Հիմնադրամի ղեկավարի խոսքով՝ այն փաստը, որ ամեն ամիս բժշկական ծառայությունների նոր օգտատերերի թիվն ավելանում է շուրջ 60 հազարով, վկայում է բարեփոխման առանցքային նպատակներից մեկի իրագործման մասին. մարդիկ, ովքեր նախկինում չէին կարող իրենց թույլ տալ բուժումը, այժմ ապահովագրական ծածկույթի շնորհիվ դիմում են բժշկական օգնության և ստանում անհրաժեշտ ծառայությունները։ Խարազյանը հայտնել է, որ ապահովագրական փաթեթում այսօր ներառված է 2 882 բժշկական ծառայություն։

Հետևեք NEWS.am Medicine-ին Facebook-ում և Twitter-ում