Պետերբուրգի Ռազմաբժշկական ակադեմիայի բժիշկները Ռուսաստանի պատմության մեջ առաջին անգամ դեմքի հյուսվածքների փոխպատվաստման վիրահատություն են կատարել: Վիրահատությունը հաջող է անցել, տեղեկացրել է Ռուսաստանի առողջապահության նախարար Վերոնիկա Սկվորցովան:
«Սա վիրավոր մարդուն դեմքի հյուսվածքների համալիրի ալլոփոխպատվաստման աշխարհում 32-րդ վիրահատությունն է. մարդու դեմքն այլանդակվել էր», - ասել է Սկվորցովան ՌԴ Պաշտպանական վարչության ազգային կենտրոնում մամուլի ասուլիսի ընթացքում:
Նախարարը նշել է, որ չնայած վիրահատությունն անցկացվել է ավելի քան կես տարի առաջ, դրա հաջող ընթացքի մասին միայն այսօր կարելի է խոսել, «որովհետեւ պիտի տեսնեինք, թե վիրահատությունից հետո ինչպես է ընթանալու վերականգնումը»:
Սկվորցովայի խոսքով, Ռուսաստանը դարձել է ութերորդ երկիրը, որը բարձր տեխնոլոգիաների շնորհիվ կարողացել է նման վիրահատություն իրականացնել, տեղեկացնում է «Ինտերֆաքսը»:
Նա նաեւ պատմել է, որ վիրահատության համար անհրաժեշտ է եղել լրջորեն փոփոխել նորմատիվ բազան:
Ինչպես տեղեկացրել է Կիրովի անվան Ռազմաբժշկական ակադեմիայի վնասվածքաբանության եւ օրթոպեդիայի ամբիոնի դոցենտ Մարիա Վոլոխը, Ռուսաստանում դեմքի փոխպատվաստման առաջին վիրահատության նախապատրաստությունը հինգ տարի է խլել, փորձարկումներ են կատարվել կրծողների վրա:
«Մասնագետները առնետների դեմքի փոխպատվաստման վիրահատություններ են կատարել, ինչից հետո կրծողները եւս մեկ ու կես-երկու տարի ապրել են», - ասել է Վոլոխը:
Դարձյալ վիրահատության նախապատրաստման ընթացքում բժիշկները հիվանդի դեմքի թվային եւ նյութական 3-D մոդելներ են ստեղծել, որոնց վրա բազմիցս կատարվել են դեմքի փոխպատվաստման առաջիկա վիրահատության «փորձեր», ասել է Վոլոխը:
Դեմքի հյուսվածքների բարդ համալիրի փոխպատվաստման առաջին վիրահատությունն իրականացվել է Ֆրանսիայում` 2005-ին, երբ հիվանդի դեմքին, որին կծել էր շունը, փոխպատվաստել են կզակը, շուրթերը եւ քիթը: Աշխարհում ընդհանուր առմամբ 40 նման վիրահատություն է կատարվել, բայց 33-ն են հաջող համարվել:
Հետևեք NEWS.am Medicine-ին Facebook-ում և Twitter-ում