Հայաստանում այսօրվա դրությամբ ավելի քան 600 ատամնաբուժական կլինիկա է գործում: Նրանցից ինչպես ընտրել այն լավ կլինիկան, որտեղ Դուք համարժեք գումարի դիմաց կկարողանաք որակյալ սպասարկում ստանալ եւ որտեղից ձեզ հետ «նվեր» չեք տանի ՄԻԱՎ-ի կամ հեպատիտի տեսքով:
Հայաստանի Առողջապահության նախարարության գլխավոր ատամնաբույժ-վիրաբույժ Կարեն Գրիգորյանը խորհուրդ է տալիս կլինիկայի ընտրության հարցում ուշադրություն դարձնել նրա արտոնագրին: Այն, որ կլինիկան պիտի արտոնագիր ունենա, ինքնին հասկանալի է: Ուշադրություն դարձրեք, թե գործունեության ինչ տեսակներ է թույլատրում այդ արտոնագիրը. Արդյո՞ք իրավունք տալիս է վիրաբուժական միջամտություն, բուժում, իմպլանտացիա կամ այլ պրոցեդուրաներ իրականացնելու: Եթե պատրաստվում եք ատամ հեռացնել, իսկ ձեր ընտրած կլինիկայի արտոնագրում նշված չէ, որ այն վիրահատական միջամտության իրավունք ունի, գուցե արժե, որ Դուք ուրիշ կլինիկա փնտրեք:
Մասնագետը խորհուրդ է տալիս ուշադրություն դարձնել նաեւ կլինիկայի մաքրությանը եւ անձնակազմի մաքրասիրությանը: Օրինակ` ատամնաբուժական աթոռը պիտի մաքուր լինի. այն պիտի մաքրեն ամեն հիվանդից հետո:
Ուշադրություն դարձրեք նաեւ բժշկի օգտագործած գործիքներին: Մանրէազերծումից հետո գործիքները սովորաբար փաթեթավորում են հատուկ մանրէազերծված փաթեթներում, որոնց վրա գրվում է նաեւ այդ գործիքների «պիտանելիության ժամկետը». այն ժամանակը, որի ընթացքում դրանք մանրէազերծ կլինեն եւ պիտանի կլինիկայում օգտագործման համար: Ցանկալի է, որ հենց Ձեր աչքի առաջ բացեն գործիքների փաթեթը. այդ դեպքում կկարողանաք վստահ լինել, որ գործիքը համապատասխան մշակում է անցել եւ մանրէազերծ է:
Ինչ վերաբերում է գներին, ընտրեք այն կլինիկան, որն ավելի համապատասխանում է Ձեր գրպանին: Սակայն Կարեն Գրիգորյանը զգուշացնում է, որ ատամնաբուժության մեջ չափից ավելի ցածր գներ լինել չեն կարող, որովհետեւ լավ նյութերի ինքնարժեքը բավականին բարձր է: Եթե կլինիկան չափից ավելի ցածր գներ է առաջարկում, ուրեմն ամենայն հավանականությամբ խնայողություն է անում կամ նյութի որակի վրա, կամ մաքրության կամ էլ, օրինակ, մանրէազերծման:
Հետևեք NEWS.am Medicine-ին Facebook-ում և Twitter-ում