Ցավոտ էնդոմետրիոզը կանանց թույլ չի տալիս հղիանալ

Ցավոտ էնդոմետրիոզով տառապող կանայք բեղմնավորվելու համար զգալիորեն ավելի շատ ժամանակի եւ անպտղության ավելի երկարատեւ բուժման կարիք ունեն, քան նրանք, ում մոտ էնդոմետրիոզի ախտանիշները պակաս են արտահայտված: Այս մասին հայտնում են Descartes University-ի (Ֆրանսիա) հետազոտողները:

Դրանից բացի, ցավոտ էնդոմետրիոզով կանայք նաեւ ավելի հաճախ են դեռեւս մինչեւ հղիանալը վիրաբուժական միջամտության կարիք ունենում: Ըստ երեւույթին, բանն այն է, որ այսպիսի կանանց մոտ ավելի հաճախ են պատահում մարմնի մեջ խորը տեղադրված հատվածներ, որոնք ախտահարված են հիվանդությամբ, ներառյալ աղիները:

Հետազոտության ընթացքում ֆրանսիացի գիտնականները հետեւել են էնդոմետրիոզի ախտորոշմամբ կանանց առողջական վիճակին: Նրանցից 422 կին բնական բեղմնավորման ունակ չէր նաեւ մեկ տարի փորձելուց հետո: Երբ նրանք իրենց ցավը գնահատել են 10-միավորանոց սանդղակով, 289-ի գնահատականը եղել է 7 եւ ավելի: Գիտնականները նաեւ հետեւել են այս կանանց վիրաբուժական միջամտությունների արդյունքներին:

Պարզվել է, որ էնդոմետրիոզի դեպքում ամենացավոտ ախտանիշներով կանանց բեղմնավորման համար զգալիորեն ավելի շատ ժամանակ էր անհրաժեշտ: Նրանք նաեւ ավելի հաճախ են վիրաբուժական միջամտությունների եւ հղիանալու նպատակով անպտղության բուժման տարատեսակ մեթոդների անհրաժեշտություն ունեցել:

Էնդոմետրիոզին բախվում է կանանց մոտ 10 տոկոսը, ըստ որում՝ մեծ մասը վերարտադրողական տարիքում, այսուհանդերձ՝ հիվանդության մասին տեղեկությունները բավականին սակավաթիվ են: Էնդոմետրիոզի ժամանակ էնդոմետրիումի բջիջները գերաճում են այդ շերտի սահմաններից:

Գիտնականները հույս ունեն, որ իրենց ստացած եզրակացությունները կնպաստեն այս խանգարման ընթացքի վերաբերյալ կանանց եւ բժիշկների ավելի շատ իրազեկվածությանը, ինչը կօգնի այն ավելի վաղ եւ ճշգրիտ ախտորոշել:

Հետևեք NEWS.am Medicine-ին Facebook-ում և Twitter-ում