ԱՄՆ-ի սննդամթերքի եւ դեղորայքի որակի վերահսկողության վարչությունը (FDA) հավանության է արժանացրել քաղցկեղի բուժման նոր կուրսը, որի ժամանակ հենց հիվանդի՝ գենետիկորեն մոդիֆիկացված արյան բջիջներն են օգտագործվում:
Դրանք ակտիվացնում են հիվանդի իմունային համակարգը, որպեսզի այն ակտիվորեն ոչնչացնի քաղցկեղային բջիջները: FDA-ի ներկայացուցիչները սա պատմական պահ են կոչել եւ հավելել, որ բժշկությունը նոր մակարդակի է բարձրանում:
Novartis ընկերության ներկայացրած Kymriah դեղամիջոցով բուժման կուրսի արժեքը 475 հազար դոլար է: Կուրսն անցնելուց հետո հիվանդների շուրջ 83%-ը բուժվել է արյան քաղցկեղի տեսակներից մեկից:
«Հիվանդի բջիջները մահացու քաղցկեղի դեմ պայքարի համար վերածրագրավորելու հնարավորություն ունենալով՝ մենք ելնում ենք բժշկական նորարարությունների նոր մակարդակ: Նոր տեխնոլոգիաները, ինչպիսիք են գենային եւ բջջային թերապիան, կարող են արմատապես փոխել բժշկությունը եւ մոտեցնել բազմաթիվ անհույս հիվանդություններն ամբողջությամբ բուժելու՝ բեկումնային պահը»,- հայտարարել է FDA-ի ներկայացուցիչ Սքոթ Գոթլիբը:
Բժիշկ Սթեֆան Գրափը, որը Ֆիլադելֆիայի մանկական հիվանդանոցում առաջինն է կիրառել CAR-T թերապիան, սա կարեւոր բացահայտում է կոչել: CAR-T-ի կուրս անցնող 63 հիվանդների 83%-ը երեք ամսվա ընթացքում լիարժեք ռեմիսիայի փուլի է հասել: Գիտնականներն առայժմ տվյալներ են հավաքում նման թերապիայի երկարաժամկետ ազդեցության մասին:
Սակայն բուժումը նաեւ վտանգներ է պարունակում: Հնարավոր կողմնակի ազդեցություններից է ցիտոկինների արտանետման՝ մահացու վտանգավոր համախտանիշը, որը կարող է զարգանալ մարմնում CAR-T բջիջների արագ տարածման հետեւանքով: Դա կարելի է վերահսկել դեղորայքի օգնությամբ:
Սակայն CAR-T տեխնոլոգիայի պոտենցիալը քաղցկեղի միայն մեկ տեսակի բուժման մեջ չէ: Բժիշկ Դեւիդ Մալոնին ամերիկյան կարգավորիչի որոշումը դարակազմիկ պահ է կոչել:
«Վստահ ենք, որ սա բազմաթիվ այլ տեխնոլոգիաների շարքում առաջինն է՝ իմունաթերապիայի հիման վրա քաղցկեղի տարբեր տեսակների բուժման համար»,- ասել է նա:
Cancer Research UK բարեգործական կազմակերպության բժիշկ-խորհրդատու, պրոֆեսոր Փիթեր Ջոնսոնը նույնպես FDA-ի որոշումը կարեւոր քայլ է կոչել:
«Մենք դեռ պետք է պարզենք, թե ինչպես է պետք է անվտանգ օգտագործել այդ թերապիան եւ ում է հարմար, այնպես որ՝ հարկավոր է խոստովանել, որ սա ընդամենը առաջին քայլն է»,- ասել է նա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր