Չինացի գիտնականներն արհեստական մաշկի տեսքով սարք են ստեղծել առողջական վիճակի մոնիթորինգի համար

Չինացի գիտնականները սարք են ստեղծել մարդու առողջական վիճակի մոնիթորինգի համար, որն իրենից ներկայացնում է գրաֆենի հիմքով արհեստական մաշկ եւ կարող է փոխարինել ըստ գործառնության համանման սարքերին:

e-skin էլեկտրոնային մաշկը բարակ, ձգվող, մարդկային մաշկը նմանակող նյութ է, որը դիմացկուն է ճնշման, ջերմաստիճանի փոփոխությունների եւ արտաքին ֆիզիկական ներգործության նկատմամբ, այդ թվում՝ գերձգման: Մշակողների խոսքով, որոնք Պեկինի Ցինհուայի համալսարանի աշխատակիցներ են, գրաֆենի օգտագործումն ապահովում է սարքի «գերազանց ճկունությունն ու անցանելիությունը», ինչը նյութը «կատարյալ է դարձնում ինովացիոն սարքի արտադրության համար»:

Մշակողները հայտնում են, որ «արհեստական մաշկը կարող է ամրացվել ոչ միայն մարդու մարմնին, այլ նաեւ ուրիշ օբյեկտների, օրինակ՝ գործվածքին (հագուստին) եւ այլ նյութերի»: Ինչպես պարզաբանել են սարքը ստեղծողները, դա առողջական վիճակի մոնիթորինգի որակի վրա չի ազդում՝ անկախ տեղադրությունից սարքը միատեսակ ճշգրիտ հաշվում է մարդու սրտի զարկերի, շնչառության ցուցանիշները, ինչպես նաեւ արձագանքում հիվանդի ձայնին:

Գիտնականները նաեւ նշում են, որ ինովացիոն սարքը պատրաստելիս կիրառվել է լազերային սքորինգի տեխնոլոգիան՝ «մաշկի» մակերեւույթին հանձնարարված խորությամբ գծային կտրվածքների կատարումը, ինչը թույլ է տալիս սարքը հարմարեցնել եւ այն պատրաստել անհատական պարամետրերը հաշվի առնելով: Մշակողների խոսքով՝ սա պայմանավորում է բժշկության մեջ սարքի օգտագործման հեռանկարայնությունը եւ նպաստում է դրա ապագա վաճառահանմանը:

Հետևեք NEWS.am Medicine-ին Facebook-ում և Twitter-ում