Գիտնականներն առաջարկել են որդանման ելունի բորբոքումն առանց վիրահատության բուժել

Ֆիննական Թուրկու համալսարանի գիտնականներն առաջարկել են ապենդիցիտի բուժման հեղափոխական մեթոդ՝ կույր աղիի բորբոքված որդանման ելունի հեռացման փոխարեն հետազոտողներն առաջարկում են ընդունել հակաբիոտիկների հատուկ տեսակ, հայտնում է JAMA ամսագիրը:

Ապենդիցիտի դեպքում բորբոքվում է հաստ աղիի որդանման ելունը՝ ապենդիկսը: Քանի որ այն թերաճ օրգան է, բարդություններով չուղեկցվող բորբոքման դեպքում դրա հեռացման վիրահատությունը բավական անվտանգ է: Մինչեւ հեռացումը նաեւ պահանջվում է հակաբիոտիկների ներերակային ներարկում՝ բորբոքային պրոցեսների նվազեցման նպատակով: Եթե որդանման ելունը չի պայթել, հակաբիոտիկների ընդունումը կարող է հիվանդների վիճակը զգալիորեն լավացնել, ուստի ենթադրվում է, որ հակաբիոտիկները գուցե բավարար են ոչ բարդ ապենդիցիտի բուժման համար:

Թուրկու համալսարանից Պաուլինա Սալմինենի ղեկավարությամբ գիտնականները պատահական ընտրանքով հետազոտություն են անցկացրել հսկիչ խմբում, որին մասնակցել է բարդություններով չուղեցկվող սուր ապենդիցիտ ախտորոշմամբ 530 մարդ (18-ից մինչեւ 60 տարեկան): Մասնակիցներից 273-ը ստանդարտ միջամտությունների եւ որդանման ելունի հեռացման վիրահատության է ենթարկվել, իսկ 257-ին երեք օր ներերակային էրտապենեմ են ներարկել (կարբապենեմների դասի հակաբիոտիկ), որից հետո նրանք պետք է եւս մեկ շաբաթ հակաբիոտիկ ընդունեին (լեւոֆլոկսացին եւ մետրոնիդազոլ):

Բուժումն ավարտելուց հետո հիվոնդներին 5 տարի հետեւել են: Հակաբիոտիկներով բուժված հիվանդներից վիրահատության կարիք է ունեցել 70-ը՝ բուժման ավարտից հետո առաջին տարվա ընթացքում, եւս 30-ը՝ հետագա 5 տարիների ընթացքում: Դրանից բացի, դիտարկման ժամանակահատվածում հետվիրահատական բարդություններ են առաջացել (ցավ փորում, վիրահատված հատվածի բորբոքում եւ ճողվածք) հիվանդներից 24,4 տոկոսի մոտ՝ որդանման ելունի հեռացումից հետո եւ 6,5 տոկոսի մոտ՝ հակաբիոտիկներով բուժումից հետո: Ավելին՝ հակաբիոտիկներով բուժվող հիվանդների վերականգնման ժամանակահատվածը բուժումից հետո 11 օրով կարճ է եղել:

Հետազոտության արդյունքները ցույց են տալիս ապենդիցիտի ոչ վիրահատական բուժման մեծ ներուժը: Հարկ է նշել, որ գիտնականների դիտարկած ապենդիցիտի դեպքերը բարդություններ չեն ունեցել:

Հետևեք NEWS.am Medicine-ին Facebook-ում և Twitter-ում