Mylan Pharmaceuticals դեղագործական ընկերությունը ԱՄՆ-ում հետ է կանչել արյան բարձր ճնշման դեմ բոլոր դեղամիջոցները, որոնք պարունակել են վալսարտան նյութը: Այս դեղերի մեջ լաբորատոր թեստերով հայտնաբերել են հնարավոր քաղցկեղածինի հետքեր:
Երկու շաբաթ առաջ այս ընկերությունն արդեն հետ էր կաչել այդ դեղերի մի մասը, երբ դրանց բաղադրութայն մեջ քաղցկեղ առաջացնող քիմիական նյութի մնացորդային պարունակություն էին հայտնաբերել: Երեքշաբթի Mylan-ը հայտարարել էր եւս 104 անուն դեղեր հետ կանչելու մասին՝ լրացնելով արդեն հետ կանչված 15-ը:
Վալսարտանը նյութ է, որը նախատեսված է արյան բարձր ճնշումը եւ սրտային անբավարարությունը բուժելու համար, ինչպես նաեւ սրտի կաթվածից հետո մահվան հավանականությունը նվազեցնելու համար: Այս դասվում է այն դեղերի կարգին, որոնք հայտնի են որպես անգիոտենզին ռեցեպտորների բլոկատորներ, որոնք արգելափակում են անգիոտենզին II բնական հորմոնը, որը զարկերակները նեղացնում է: Վալսարտանը ամլոդիպինի կամ հիդրոքլորտիազիդի զուգակցությամբ կիրառելու դեպքում են հասնում միայն զարկերակային ճնշման նվազեցման միակ արդյունքին:
Mylan-ի լաբորատոր թեստերը ցույց են տվել, որ վալսարտանի մեջ կան N-նիտրոզոդիմետիլամին կոչվող նյութի մնացորդային հետքեր: Այս բաղադրիչը պարունակվում է նաեւ ծխախոտի ծխի մեջ եւ համարվում է մարդու համար հնարավոր քաղցկեղածին:
Նշենք, որ վալսարտանի հիմքով արտադրանքն արդեն առաջին անգամ չէ, որ դեղագործական ընկերությունները վաճառքից հետ են կանչում՝ կապված քաղցկեղածինի հնարավոր պարունակության հետ:
Վալսարտանով դեղամիջոցներ ընդունող հիվանդներին խորհուրդ է տրվում կապ հաստատել իրենց բուժող բժշկի հետ եւ այլ դեղամիջոցի անցնել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր