Ֆիզիկական մարզումները ծանրաբեռնում են ոչ միայն մկանները, այլ նաեւ ուղեղը

Ֆրանսիայից եւ Մեծ Բրիտանիայից գիտնականները պարզել են, որ ֆիզիկական մարզումների ժամանակ հոգնում են մարդու ոչ միայն մկանները, այլեւ գլխուղեղի այն հատվածը, որը պատասխանատու է որոշումների կայացման համար: Սա տեղի է ունենում այն պատճառով, որ մարդը մշտապես իրեն վերահսկում է, որ չգերհոգնի եւ վնասվածք չստանա, կարծում են հետազոտողները: Այս մասին հայտնում է Current Biology-ն:

Մարզիկների ֆիզիկական հոգնածությունը կարող է առաջանալ ոչ միայն զուտ ֆիզիկական ուժասպառությունից, զգալի ավանդ ունի նաեւ մտավոր ծանրաբեռնվածությունը: Գիտնականների կարծիքով՝ այս արդյունքն առանձնահատուկ կերպով արտահայտվում է այն ժամանակ, երբ մարմնամարզիկն իրեն չափից ավելի հոգնեցնում է:

Նոր աշխատանքի հեղինակները հետազոտել են 37 մարդու, որոնք եռամարտով են զբաղվում՝ մարզաձեւ, որը ներառում է վազքը, լողը եւ հեծանվավազքը: Փորձարկվողների կեսը 3 շաբաթ մարզվել է չափավոր ուժեղացված ծրագրով, որոնց ընթացքում գիտնականները նրանց ստանդարտ ծանրաբեռնվածությունը 40 տոկոսով մեծացրել են: Երկրորդ կեսը մարզվել է սովորական ռեժիմով:

Այն մասին, թե փորձի մասնակիցներն իրենց ինչպես են զգում, գիտնականները տեղեկացել են հատուկ հարցաշարերով, նրանց վարքագծի վերլուծությամբ, ինչպես նաեւ ՄՌՏ-ով: Վերջին մեթոդը գիտնականներին թույլ է տվել պարզել, թե մարզումների ժամանակ նրանց ուղեղի որ հատվածներն են գործարկվել:

Պարզվել է, որ առաջին խմբի փորձարկվողները այդ 3 շաբաթվա ընթացքում իրենց հոգնած են զգացել. այս մասին էին վկայում բոլոր ցուցանիշները: ՄՌՏ ցուցանիշներով պարզվել է, որ ակտիվացել է մարզիկների գլխուղեղի այն հատվածը, որը սովորաբար պատասխանատու է վերահսկման եւ որոշումների կայացման համար:

Գիտնականները սրա հիման վրա հանգել են այն եզրակացության, որ մարզումների ժամանակ՝ հատկապես ուժեղացված, հոգնում են ոչ միայն մկանները, որոնք կատարում են անմիջական աշխատանքը: Այս ընթացքում հոգնում է նաեւ ուղեղը, որը վերահսկում է մեր օրգանիզմում տեղի ունեցող բոլոր պրոցեսները: Այն հետեւում է, որ մկաններն ավելի շատ չհոգնեն, քան անհրաժեշտ է, որպեսզի որեւիցե վնասվածք չառաջանա:

Հետևեք NEWS.am Medicine-ին Facebook-ում և Twitter-ում