Չզտված կաթ խմող երեխաներն ավելի հազվադեպ են ավելորդ քաշ հավաքում. հետազոտություն

Չզտված կաթ խմող երեխաները 39 տոկոսով ավելի հազվադեպ են ավելորդ քաշի խնդիրներ ունենում, քան նրանք, ովքեր անյուղ կաթ են խմում։ Այս մասին ասվում է նոր հետազոտությունում, որի արդյունքները հրապարակվել են American Journal of Clinical Nutrition ամսագրում։

Մանկաբուժության ամերիկյան ակադեմիան ներկայում խորհուրդ է տալիս 2 տարեկանից մեծ երեխաներին տալ ճարպի ցածր պարունակությամբ (1 տոկոս) կամ անյուղ կաթ։ Բայց, ըստ Տորոնտոյի համալսարանի մասնագետների նոր հետազոտության տվյալների, չզտված կաթը կարող է ավելի օգտակար լինել երեխաների նորմալ քաշի պահպանման համար, քան զտվածը։

Մասնագետներն ուսումնասիրել են 14 հետազոտություն, որոնց մասնակցել է մինչեւ 18 տարեկան 20 897 երեխա։ Երեխաների մի մասը խմել է չզտված կաթ (3,25 տոկոս յուղայնությամբ), մյուսները խմել են կաթ, որի մեջ յուղայնությունը 2 տոկոսից քիչ է եղել։

Պարզվել է, որ չզտված կաթ խմած երեխաների ավելորդ քաշի կամ ճարպակալման ռիսկը 39 տոկոսով ավելի ցածր է եղել այն երեխաների համեմատ, ովքեր խմել են ցածր յուղայնությամբ կամ անյուղ կաթ։ Ավելին, հետաքրքիր է, որ երեխաների ճարպակալման հնարավորությունը նվազել է սննդաբաժնում չզտված կաթի քանակությունն ավելացնելիս։

Հետազոտողների կարծիքով՝ այս հանելուկային երեւույթը կարելի է բացատրել նրանով, որ, գուցե, չզտված կաթ խմող երեխաներն ավելի քիչ կալորիաներ ստանում են այլ մթերքներից (հատկապես վնասակար)։ Բացի այդ, ընդունված է կարծել, որ կաթի յուղը մարդուն կուշտ լինելու զգացողություն է տալիս։

Բայց չի բացառվում, որ բանն ընդամենը այն է, որ այդ երեխաների մոտ ի սկզբանե քաշը մեծ չի եղել, եւ ծնողները միտումնավոր նրանց տվել են չզտված կաթ, որպեսզի նրանք մի փոքր քաշ հավաքեն։ Այս երեւույթը պարզելու համար պահանջվում են լրացուցիչ հետազոտություններ, հավաստիացնում են մասնագետները։

Հետևեք NEWS.am Medicine-ին Facebook-ում և Twitter-ում