Հայաստանում կորոնավիրուսով վարակված 6-8 տարեկան երեխաների թիվն աճել է է 4,8 անգամ. մասնագետ

Վերջին երկու շաբաթվա ընթացքում կորոնավիրուսով վարակված 6-8 տարեկան երեխաների թիվն աճել է 4,8 անգամ՝ նախորդ 14 օրվա համեմատ: Հիվանդացությունն աճել է բոլոր տարիքային խմբերում, բայց այս խմբում նոր դեպքերի թվի աճն առավել նկատելի է: Այս մասին NEWS.am Medicine-ին տված հարցազրույցում ասաց Հայաստանի առողջապահության նախարարության Հիվանդությունների վերահսկման եւ կանխարգելման ազգային կենտրոնի համաճարակաբանության բաժնի վարիչ Ռոմելլա Աբովյանը:

Նրա խոսքով՝ վերջին երկու շաբաթվա ընթացքում 3-5 տարեկան երեխաների շրջանում հիվանդացությունն աճել է 1,6 անգամ, 6-17 տարեկան երեխաների շրջանում՝ 1,5 անգամ, իսկ 18-23 տարեկան երիտասարդների շրջանում` 1,4 անգամ:

Հիվանդացության աճի պատճառն, ըստ համաճարակաբանի, այն է, որ մարդիկ դադարել են պահպանել անվտանգության կանոնները` փողոցում, տրանսպորտում, դպրոցներում եւ այլ հաստատություններում:

Այսօր դպրոցների մեծ մասում, մասնագետի խոսքով, չեն պահպանում սոցիալական հեռավորության կանոնները: Դասասենյակներում դիմակներ չեն կրում, կամ սխալ են կրում՝ «ձեւի համար»: Արդյունքում երեխաները արագ վարակվում են միմյանցից:

«Այս ամենի պատճառով մենք այսօր արդեն շատ լուրջ իրավիճակ ունենք, եւ մտավախություն կա, որ առաջիկա շաբաթներին թվերը կարող են էլ ավելի աճել»,- ասաց մասնագետը:

Հետևեք NEWS.am Medicine-ին Facebook-ում և Twitter-ում