Որ ախտանիշներն են վկայում թոքերի քաղցկեղի մասին

Ամերիկյան ուռուցքաբանության միության տվյալներով՝ թոքերի քաղցկեղը ԱՄՆ-ում քաղցկեղից մահացությունների 25 տոկոսի պատճառն է:

Ընտանեկան բժիշկ Թոմի Միթչելը Eat This, Not That!-ին ասել է այն ախտանիշների մասին, որոնց պետք է ուշադրություն դարձնել, եւ ինչ պետք է իմանալ թոքերի քաղցկեղի մասին:

Միթչելի խոսքով՝ թեեւ ծխելը թոքերի քաղցկեղի ամենատարածված պատճառն է, ցանկացած մարդու մոտ այս հիվանդությունը կարող է զարգանալ՝ անկախ նրանից, թե որքան ժամանակ է ծխում: Գոյություն ունի թոքերի քաղցկեղի երկու հիմնական տեսակ՝ ոչ փոքր բջջային եւ փոքր բջջային: Թոքերի ոչ փոքր բջջային քաղցկեղը ամենատարածված տեսակն է, որը կազմում է բոլոր դեպքերի մոտ 80 տոկոսը:

Թոքերի փոքր բջջային քաղցկեղն ավելի ագրեսիվ է եւ հակված է ավելի արագ աճել ու տարածվել: Թոքերի քաղցկեղը կարելի է բուժել վիրահատության, ճառագայթային թերապիայի, քիմիաթերապիայի կամ այս մեթոդների համադրությամբ: Բուժման լավագույն ընթացքը կախված է հիվանդության փուլից եւ այլ գործոններից։ Բուժման մեթոդների զարգացման եւ թոքերի քաղցկեղի վաղ հայտնաբերման շնորհիվ ավելի շատ մարդիկ են փրկվում, քան նախկինում:

Բժիշկը նշել է, որ թոքերի քաղցկեղի ռիսկի այլ գործոններից են պասիվ ծխելը, ասբեստը, ռադոնը եւ օդի աղտոտվածությունը։ Բարձր ռիսկի են ենթարկված նաեւ թոքերի քաղցկեղի ընտանեկան պատմություն ունեցող մարդիկ: Ծխելը թողնելը լավագույն բանն է, որ կարող են անել ծխողները՝ ռիսկը նվազեցնելու համար: Նրանք, ովքեր երբեք չեն ծխել, պետք է հնարավորինս խուսափեն պասիվ ծխելուց: Բացի այդ, մարդիկ կարող են նվազեցնել ասբեստի եւ այլ քաղցկեղածին նյութերի ազդեցությունը՝ նախազգուշական միջոցներ ձեռնարկելով աշխատավայրում եւ տանը: Վերջապես, թոքերի քաղցկեղի համար կանոնավոր զննումը կարող է օգնել հիվանդությունը վաղ փուլում հայտնաբերել:

Մասնագետը խոսել է նաեւ թոքերի քաղցկեղի որոշ հստակ նշանների մասին։ Դրանց թվում է անընդհատ հազը։

Մեկ այլ ախտանիշ է շնչահեղձությունը:

Խռպոտությունը կամ քրոնիկ բրոնխիտը նույնպես կարող են թոքերի քաղցկեղի նշան լինել, հավելել է նա։

Հետևեք NEWS.am Medicine-ին Facebook-ում և Twitter-ում