Գիտնականները կապ են հայտնաբերել սիրտ-անոթային համակարգի վիճակի եւ ուղեղի տարիքի միջեւ

ՄՌՏ-ի լուսանկարներով գնահատելով մարդկանց ուղեղի տարիքը՝ հետազոտողների խումբը՝ Կալիֆոռնիայի համալսարանի գիտնականների ղեկավարությամբ, հայտնաբերել է ուղեղի վաղաժամ ծերացման վտանգի բազմաթիվ գործոններ։

Նրանք հայտնաբերել են, որ սիրտ-անոթային համակարգի վատ վիճակը 36 տարեկանում ենթադրում է ուղեղի ավելի մեծ տարիք ավելի մեծ տարիքում։ Ընդ որում՝ պարզվել է, որ տղամարդիկ ավելի ծեր ուղեղ ունեն, քան նույն տարիքի կանայք։ Հետազոտության արդյունքները հրապարակվել են The Lancet Healthy Longevity ամսագրում։

Գիտնականները պարզել են, որ ուղեղի ծերացումը կապված է կոգնիտիվ թեստերի փոքր-ինչ վատ արդյունքների հետ, ինչը թույլ է տվել նաեւ կանխատեսել ուղեղի չափերի մեծացում (ատրոֆիա) հաջորդ երկու տարվա ընթացքում։

Հետազոտողները՝ պրոֆեսոր Ջոնաթան Շոթի ղեկավարությամբ, կիրառել են  մեքենայական ուսուցման մշակված մոդելը՝ ՄՌՏ-ի հիման վրա գնահատելու համար Alzheimer's Research UK-ի ֆինանսավորած Insight 46 հետազոտության մասնակիցների ուղեղի տարիքը։

Բոլոր մասնակիցները 69-72 տարեկան էին, բայց նրանց ուղեղի ենթադրվող տարիքը տատանվում էր 46-93 տարեկանի միջեւ։

Սիրտ-անոթային համակարգի ավելի վատ վիճակ ունեցող 36 կամ 69 տարեկան մարդիկ ուղեղի ավելի վատ առողջություն են ունեցել, ինչպես եւ նրանք, որոնց դեպքում ՄՌՏ-ն հայտնաբերել է ցերեբրավասկուլյար հիվանդություններ (կապված արյան շրջանառության եւ ուղեղի անոթների հետ)։ Սա համահունչ է նախորդ հետազոտության արդյունքների հետ, որն իրականացրել էր պրոֆեսոր Շոթը, որի համաձայն՝ արյան բարձր ճնշումը 36 տարեկանում ենթադրում էր ուղեղի առողջության վատթարացում ավելի ուշ տարիքում։

Գիտնականները նաեւ հայտնաբերել են, որ ուղեղի ավելի մեծ տարիքը կապված է եղել արյան մեջ նեյրոֆիլամենտի թեթեւ սպիտակուցի (NfL) ավելի բարձր խտության հետ։ Ընդունված է կարծել, որ NfL-ի մակարդակի բարձրացումը տեղի է ունենում նյարդային բջիջների վնասման պատճառով եւ ավելի հաճախ է համարվում նեյրոդեգեներացիայի նշանակալի մարկեր։

Հետևեք NEWS.am Medicine-ին Facebook-ում և Twitter-ում