Գիտնականները պարզել են՝ մարդկանց որ խումբն է գենետիկորեն հակված գիրության

Էքսեթերի համալսարանի ղեկավարած միջազգային հետազոտողների խումբը պարզել է, որ SMIM1 գենն անջատող գենետիկ տարբերակով  օժտված մարդիկ ավելի բարձր մարմնի քաշ ունեն, քանի որ հանգսիտ վիճակում նրանք ավելի քիչ էներգիա են ծախսում:

SMIM1 գենը հայտնաբերվել է ընդամենը 10 տարի առաջ, երբ հետազոտողները փնտրում էին գենը, որը կոդավորում է որոշակի Vel անունով հայտնի արյան խումբ: 5000 մարդուց մեկի մեջ բացակայում են գենի երկու պատճենները, ինչը նրանց դարձնում է Vel-բացասական:

Նոր հետազոտության արդյունքները վկայում են, որ այս խումբը ևս հակված է ավելորդ քաշի։ Հետազոտությունը ցույց է տվել, որ գենի երկու պատճենները չունեցող մարդիկ ունեն գիրությանն առնչվող այլ նշաններ, ներառյալ արյան մեջ ճարպի բարձր մակարդակ, ճարպային հյուսվածքի դիսֆունկցիայի նշաններ, լյարդի ֆերմենտների բարձր մակարդակ և վահանաձև գեղձի հորմոնների ցածր մակարդակ:

Հետազոտության արդյունքները հրապարակվել են Med բժշկագիտական հանդեսում:

Հետազոտության առաջատար հեղինակ Էքսեթերի համալսարանի բժշկական դպրոցի բջջային կենսաբանության դոցենտ Մատիա Ֆրոնտինին նշում է, որ 50 տարվա ընթացքում գիրության մակարդակը գրեթե եռապատկվել է, նա կանխատեսել է, որ մինչև 2030 թվականը ամբողջ աշխարհում ավելի քան մեկ միլիարդ մարդ տառապելու է գիրությունից:

Հետազոտության շրջանակում գիտնականները վերլուծել են UK Biobank հետազոտության գրեթե 500 հազար մասնակիցների գենետիկան և 104 մարդու մեջ SMIM1 գենի տարբերակ են հայտնաբերել:

Ելնելով այս խմբերում հայտնաբերված հաճախականություններից՝ ենթադրվում է, որ SMIM1 տարբերակը կարող է գիրության առաջացմանը նպաստելու ունակ էական գործոն լինել աշխարհի մոտ  300 հազար մարդկանց շրջանում:

Գիտնականներն ուսումնասիրել են SMIM1 գենային տարբերակով մարդկանց չորս լրացուցիչ խմբերում հայտնաբերված ազդեցությունները: Նրանք պարզել են, որ այս տարբերակն ազդում է քաշի վրա՝ միջինում 4,6 կգ ավելացնելով՝ կանանց, և 2,4 կգ՝ տղամարդկանց մոտ։

«Գիրությունն առաջանում է էներգիայի ընդունման և ծախսման անհավասարակշռության պատճառով, որը հաճախ կենսակերպի, շրջակա միջավայրի և գենետիկական գործոնների բարդ փոխազդեցության արդյունք է»,-նշել են գիտնականները։ Ըստ նրանց՝ քիչ թվով մարդկանց շրջանում ճարպակալումը պայմանավորված է գենետիկ տարբերակներով։

Նման դեպքերում երբեմն հնարավոր է լինում գտնել բուժման նոր միջոցներ, որոնք օգուտ կբերեն այս մարդկանց: Հետազոտության արդյունքներն  ընդգծում են գիրության գենետիկ պատճառներն ուսումնասիրելու,  առավել համապատասխան և արդյունավետ բուժման ընտրության և դրան առնչվող սոցիալական խարանը նվազեցնելու անհրաժեշտությունը։

Հետևեք NEWS.am Medicine-ին Facebook-ում և Twitter-ում