14,5 մլրդ դրամ և 2 միլիոն դեղատոմս․ Հայաստանում ամփոփել են դեղերի ապահովագրության առաջին արդյունքները

Առողջության համընդհանուր ապահովագրության համակարգում ծավալով երկրորդ խոշոր հոդվածը դարձել է դեղորայքային ապահովումը։ Վեց ամսվա ընթացքում դեղորայքային փաթեթի ընդհանուր ծախսերը կազմել են շուրջ 14,5 միլիարդ դրամ։ Այս մասին հայտարարել է Առողջության համընդհանուր ապահովագրության հիմնադրամի ժամանակավոր պաշտոնակատար Սամվել Խարազյանը։

Դեղորայքային ապահովման ծրագրի շրջանակում առաջին վեց ամսում դուրս է գրվել շուրջ երկու միլիոն դեղատոմս, նշել է Խարազյանը։

Նրա խոսքով՝ հունվար ամսվա համեմատ դուրս գրված դեղատոմսերի քանակն ավելացել է շուրջ երեք անգամ։ Արդեն հունիսին դեղորայքային ապահովման փաթեթից օգտվել է շուրջ 172 հազար քաղաքացի։ Ընդ որում, քրոնիկ հիվանդությունների վերահսկման կամ ամբուլատոր բուժման համար անհրաժեշտ դեղեր ստացած քաղաքացիների ընդհանուր թիվը հասել է շուրջ 400 հազարի։ «Այսինքն՝ յուրաքանչյուր չորրորդ ապահովագրված քաղաքացին ստացել է այդ դեղերը հիվանդությունը վերահսկելու կամ ամբուլատոր բուժում անցնելու համար»,- նշել է Խարազյանը։

Ներկայումս փաթեթում ընդգրկված է շուրջ 1340 անուն դեղամիջոց։ Փաստացի այս ընթացքում նշանակվել են 1160 անուն դեղեր։ Մեկ ապահովագրվածի հաշվարկով՝ դեղորայքի միջին ծախսը կազմել է շուրջ 20 հազար դրամ, իսկ մեկ դեպքի միջին արժեքը՝ շուրջ 4126 դրամ։

Ըստ Խարազյանի՝ դեղորայքային ապահովման մասով ևս նկատվում է ծախսերի որոշակի կայունացում։ Նա պարզաբանել է, որ դեղերը տրամադրվում են եռամսյակային կտրվածքով, և բժիշկները կարող են քրոնիկ հիվանդություններ ունեցող պացիենտներին դեղեր նշանակել միանգամից երեք ամսվա համար։ Այդ պատճառով յուրաքանչյուր եռամսյակի սկզբում արձանագրվում են ծախսերի որոշակի աճի սահմաններ։

Վեց ամսվա ընթացքում դեղորայքային փաթեթի ընդհանուր ծախսերը կազմել են շուրջ 14,5 միլիարդ դրամ։ Խարազյանի գնահատմամբ՝ շուրջ 3 միլիարդ դրամի մակարդակով ամսական միջին ծախսերը կպահպանվեն նաև մինչև տարեվերջ։

Խոսելով դեղերի ամենապահանջված խմբերի մասին՝ Սամվել Խարազյանը նշել է, որ առաջատար տեղ են զբաղեցնում սիրտ-անոթային հիվանդությունների վերահսկման դեղամիջոցները։ Այս խմբին է բաժին ընկնում փոխհատուցված դեղերի շուրջ 61%-ը։ Երկրորդ տեղում հակադիաբետիկ դեղերն են, որոնց համար փոխհատուցումների ընդհանուր ծավալը կազմում է շուրջ 15%։ Բացի այդ, ապահովագրական փաթեթի շրջանակում փոխհատուցվել են շնչառական համակարգի, վարակային հիվանդությունների, ինչպես նաև ստամոքս-աղիքային տրակտի հիվանդությունների և այլ քրոնիկ վիճակների բուժման համար կիրառվող դեղերը։

Վերլուծելով բժշկական ծառայություններից օգտվողների տարիքային խմբերի կառուցվածքը՝ Խարազյանը նշել է, որ, ինչպես և սպասվում էր, դիմելիության ամենաբարձր ցուցանիշը նկատվում է 65 և բարձր տարիքի քաղաքացիների շրջանում։ Այս տարիքային խմբին դեղերի և բժշկական ծառայությունների տրամադրման համար արդեն ուղղվել է շուրջ 57 միլիարդ դրամ։ Նրա խոսքով՝ այս ցուցանիշը զգալիորեն գերազանցում է մյուս տարիքային խմբերի՝ 18 տարեկանից փոքր քաղաքացիների և 18-64 տարեկանների վրա կատարված ծախսերը։

Հետևեք NEWS.am Medicine-ին Facebook-ում և Twitter-ում