Գևորգ Թամամյանն առաջադրվել է ԱՀԿ գլխավոր տնօրենի պաշտոնում

Առողջապահության համաշխարհային կազմակերպության 78-ամյա պատմության ընթացքում առաջին անգամ հայի անուն է հայտնվել կազմակերպության գլխավոր տնօրենի պաշտոնի համար առաջադրված թեկնածուների շարքում։

Հայ մանկական ուռուցքաբան Գևորգ Թամամյանի թեկնածությունն ԱՀԿ գլխավոր տնօրենի պաշտոնում առաջադրել է Բոտսվանայի Հանրապետությունը։

Իր առաջադրման մասին Թամամյանը հայտնել է սոցիալական ցանցերում՝ շնորհակալություն հայտնելով Բոտսվանայի նախագահ Դումա Գիդեոն Բոկոյին և երկրի կառավարությանը՝ ցուցաբերած վստահության համար։

«Բոտսվանան ամբողջ աշխարհին ցույց է տվել, թե ինչի կարող է հասնել վճռական ազգային ղեկավարությունը՝ առողջապահության ոլորտում արտակարգ մարտահրավերների պայմաններում։ Ինձ համար մեծ պատիվ է առաջադրվել մի երկրի կողմից, որն ունի տոկունության և առաջընթացի նման հարուստ պատմություն։

Իմ ամբողջ մասնագիտական գործունեության ընթացքում ես աշխատել եմ որպես մանկական ուռուցքաբան՝ զարգացնելով բժշկական օգնությունը այն վայրերում, որտեղ ռեսուրսները սահմանափակ էին, իսկ համայնքները՝ անբավարար սպասարկված։ Ես տեսել եմ երեխաների, որոնք ողջ են մնացել, երբ քչերն էին հավատում, որ դա հնարավոր է։ Եվ ես տեսել եմ երեխաների մահը միայն այն պատճառով, որ նրանք ծնվել էին որոշակի վայրում։

Աշխարհագրությունը չպետք է որոշի, թե ով կապրի։

Երբ ես մեծանում էի, «ԱՀԿ-ի կողմից առաջարկված» բառերը վստահություն էին ներշնչում։ Այսօր՝ ապատեղեկատվության տարածման և ինստիտուտների նկատմամբ վստահության նվազման պայմաններում, մենք պետք է ապահովենք, որ աշխարհը շարունակի ունենալ ԱՀԿ՝ ավելի ուժեղ, ավելի ճկուն և ժամանակակից իրողություններին ավելի լավ համապատասխանող։

Իմ տեսլականը հստակ է․ Առողջապահության համաշխարհային կազմակերպություն, որը գործում է ավելի արագ, ավելի արդյունավետ և անդամ պետությունների հետ իրական գործընկերության պայմաններում, որպեսզի առողջապահության ոլորտում առաջընթացը հասանելի լինի յուրաքանչյուր մարդու՝ աշխարհի ցանկացած վայրում։

Ինձ համար նաև մեծ պատիվ է այս գործընթացին մասնակցել նման հեղինակավոր թեկնածուների կողքին, որոնցից յուրաքանչյուրն իր կարևոր փորձն ու տեսակետներն է բերում։

Առաջիկա ամիսներին ակնկալում եմ լսել աշխարհի բոլոր տարածաշրջանների անդամ պետությունների ներկայացուցիչներին և ակտիվորեն համագործակցել նրանց հետ», - գրել է նա։

Հետևեք NEWS.am Medicine-ին Facebook-ում և Twitter-ում