Ծխող հայերի մեծամասնությունը նախընտրում է քաղցել, բայց չհրաժարվել ծխելուց. NEWS.am Medicine-ի հարցումը

Շատ երկրներում ծխախոտի գների ավելացումը հանգեցնում է ծխողների թվի կրճատմանը: Հայաստանում այդ մոտեցումը, թվում է, քիչ բան կփոխի. NEWS.am Medicine-ի ընթերցողների շրջանում անցկացված հարցումը ցույց է տվել, որ ծխող հայերը կգերադասեն քաղցել, բայց չեն հրաժարվի ծխելուց: 

Հարցման համաձայն, ծխողների 3 տոկոսը կթողնի ծխելը, եթե ծխախոտը Հայաստանում թանկանա 20 տոկոսով: Ծխողների եւս 7 տոկոսը կթողնի ծխելը, եթե ծխախոտը թանկանա 50 եւ ավելի տոկոսով: Հարցվածների 4 տոկոսը հայտնել է, որ ինքն այնքան փող ունի, որ կկարողանա ծխախոտի ցանկացած գնի պարագայում շարունակել ծխելը: Հարցվածների եւս 13 տոկոսը հայտնել է, որ նույնիսկ եթե ծխախոտը թանկանա մի քանի անգամ, ինքը պատրաստ է քիչ փող ծախսել սննդի վրա եւ քիչ ուտել, սակայն չի հրաժարվի ծխելուց: 

Մյուս կողմից, հարցվածների 73 տոկոսը հայտնել է, որ չի ծխում, այդ պատճառով իր համար մեկ է, թե որքան կարժենա ծխախոտը: 

Ընդհանուր առմամբ հարցմանը 439 մարդ է մասնակցել:

Նշենք, որ Հայաստանն այսօրվա դրությամբ մեկն է այն երկրներից, որտեղ ծխախոտը վաճառում են առավել մատչելի գնով, ինչի արդյունքում ծխողների մեծամասնությունը եւ նույնիսկ շատ երեխաներ կարող են առանց որեւէ խնդրի իրենց թույլ տալ ծխախոտ գնել: Սակայն, ինչպես ցույց է տալիս այլ երկրների փորձը, ծխախոտի գնի աճն իրականում մարդկանց ստիպում է թողնել ծխելը. ծխախոտի գնի նույնիսկ 20 տոկոս թանկացումը, պարզվում է, բավականին շոշափելի հարված է նրանց գրպանին, եւ մարդիկ գերադասում են չծխել եւ այդ փողը ծախսել ուրիշ բանի վրա:

Հետևեք NEWS.am Medicine-ին Facebook-ում և Twitter-ում