Փոքր չափի սպիտակուցի մեջ նախկինում չհայտնաբերված գենետիկական մուտացիան զգալի պաշտպանություն է ապահովում Պարկինսոնի հիվանդությունից և բացում է նոր ուղղություն  բուժման հնարավոր մեթոդների համար, ասվում է Հարավային Կալիֆորնիայի համալսարանին կից  Լեոնարդ Դևիսի Գերոնտոլոգիայի դպրոցի նոր հետազոտության մեջ:

Պարզվել է, որ SHLP2 կոչվող միտոքոնդրիալ միկրոպրոտեինում տեղակայված տարբերակն օժտված է Պարկինսոնի հիվանդության դեմ  բարձր պաշտպանությամբ: Այս մուտացիան ունեցող մարդկանց մոտ այս հիվանդության զարգացման հավանականությունը երկու անգամ ցածր է, քան նրանց մոտ, ովքեր չեն կրում այն: Սպիտակուցի տարբերակը համեմատաբար հազվադեպ է և հանդիպում է հիմնականում եվրոպական ծագում ունեցող մարդկանց մոտ:

Հետազոտության արդյունքները հրապարակվել են Molecular Psychiatry ամսագրում:

SHLP2-ն առաջին անգամ հայտնաբերել է Հարավային Կալիֆորնիայի համալսարանի Լեոնարդ Դևիսի դպրոցի հետազոտող Պինկաս Քոհենը 2016 թվականին, այն արտադրվում է բջիջի միտոքոնդրիումներում:

Այս վերջին բացահայտումը հիմնված է USC թիմի կողմից անցկացված նախորդ միտոքոնդրիումային հետազոտության վրա և ներկայացնում է առաջընթաց երկարակեցության գիտության, ճշգրիտ առողջության և միկրոպրոտեինների հայտնաբերման խաչմերուկում:

«Այս հետազոտությունը խորացնում է մեր այն  ըմբռնումը, թե ինչու մարդիկ կարող են հիվանդանալ Պարկինսոնի հիվանդությամբ, և ինչպես  կարող ենք այս ավերիչ հիվանդության   բուժման նոր մեթոդներ մշակել: Բացի այդ, քանի որ հետազոտությունների մեծ մասն անցկացվում է միջուկում սպիտակուցները կոդավորող հայտնի գեների վրա, սա ընդգծում է միտոքոնդրիումներից ստացվող միկրոպրոտեինների ուսումնասիրության կարևորությունը՝ որպես ծերացման հիվանդությունների կանխարգելման և բուժման նոր մոտեցում», - նշում են գիտնականները: