Ծանր վերմակները՝ ապակե կամ պլաստիկե գնդիկներով լցված հաստ ծածկոցները, խոստանում են ազատել տագնապից և անքնությունից: Հայտնի անձինք և բլոգերները հավատացնում են, որ դրանց շնորհիվ ավելի խոր քուն են մտնում և ավելի հանգիստ են զգում իրենց: Սակայն գիտնականները զգուշացրել են. այդ ծածկոցների արդյունավետությունն այնքան էլ ակնհայտ չէ, որքան պնդում է գովազդը, գրում է The Conversation պորտալը:

Վերմակի գործողության սկզբունքը պարզ է՝ այն մարմնի վրա հավասարաչափ ճնշում է գործադրում՝ ստեղծելով գրկախառնության կամ պաշտպանության զգացողություն, մի ազդեցություն, որը մասնագետները «խոր շոշափողական խթանում»են անվանում:  Սովորաբար, նման վերմակի քաշը կազմում է մարդու մարմնի զանգվածի մոտ 10%-ը:

Գիտական ​​​​տվյալները մատնանշում են ծանր վերմակների օգուտները, սակայն վերապահումներով: Հոգեբուժական կլինիկայի 120 բուժառուի մասնակցությամբ մի հետազոտության մեջ ծանր վերմակներն օգնել են նվազեցնել դեպրեսիայից, անհանգստության խանգարումներից և ուշադրության պակասի ախտանիշից տառապող մարդկանց անքնությունը: Մյուս հետազոտությունները ցույց են տվել անհանգստության նվազում մասնակիցների մոտավորպես 60%-ի շրջանում:

Սակայն այս բոլոր հետազոտություններն անցկացվել են հոգեկան առողջության խնդիրներ ունեցող մարդկանց շրջանում: Առողջ օգտատերերի համար արդյունավետության համոզիչ ապացույցներ չկան: Տեսությունները ցույց են տալիս, որ քնի կամ անհանգստության խնդիրներ չունեցող վերահսկիչ խմբերը վիճակագրորեն նշանակալի բարելավումներ չեն ցուցաբերում: Ավելին, հրապարակումների մոտ կեսը չի համապատասխանում խիստ որակի չափանիշներին, ինչը կասկածի տակ է դնում գովազդային պնդումների մասշտաբը։

Ընդսմին, ծանր վերմակները կարող են օգտակար լինել մարդկանց որոշակի կատեգորիաների, մասնավորապես բուժաշխատողների, օդաչուների և փրկարարների համար, որոնք աշխատում են հերթափոխով և ստիպված են քնել ցերեկը: Դրանք մարդկանց օգնում են հանգստանալ և ավելի արագ քուն մտնել: Բացի դրանից, գործում է նաև պլացեբոյի էֆեկտը (մարդու ինքանազգացողության բարելավումն այն բանի շնորհիվ, որ նա հավատում է որոշակի (իրականում բուժական արժեք չունեցող) բուժման տեսակի կամ նյութի ազդեցության արդյունավետությանը –խմբ.). եթե մարդն իսկապես ավելի հանգիստ է զգում ծանր վերմակի տակ, դա ինքնին բարելավում է քնի որակը։

Միևնույն ժամանակ, կան որոշ հակացուցումներ: Շնչառական համակարգի, սրտի հիվանդություններից, արյան շրջանառության խախտումներից, արյան բարձր ճնշսւմից, շաքարախտից կամ կլաուստրաֆոբիայից տառապող մարդիկ պետք է խորհրդակցեն բժշկի հետ: Երեխաների կամ այն ​​մարդկանց համար, ովքեր չեն կարողանում դուրս գալ վերմակի տակից խորհուրդ չի տրվում օգտագործել ծանր վերմակներ։

Մեծ հաշվով, մասնագետները ծանր վերմակները քնի բարելավման անվտանգ, բայց գերագնահատված միջոց են համարում: Դրանք չեն փոխարինում լիարժեք հանգստին, քնի հիգիենային կամ հոգեթերապիային, սակայն կարող են հաճելի լրացում դառնալ երեկոյան հանգստանալու արարողությանը: