Դրեքսելի համալսարանի նոր հետազոտությունը ցույց է տվել, որ ավելի ու ավելի շատ դեռահասներ կախվածություն են ձեռք բերում արհեստական ​​բանականությամբ աշխատող չաթբոտներից, ինչը մտահոգություններ է առաջացնում դեռահասների հոգեկան առողջության և առօրյա կյանքի վրա ազդեցության առնչությամբ։

Գիտնականների գնահատմամբ՝ ԱՄՆ-ում դեռահասների կեսից ավելին պարբերաբար Character.AI, Replika և Kindroid նման ուղեկցող հավելվածներ են օգտագործում, որոնք նախատեսված են հաղորդակցությունը և հուզական աջակցությունը մոդելավորելու համար: Թեև այդ ծառայությունները նախատեսված են զվարճանքի և աջակցության համար, դրանց օգտագործումը կարող է անառողջ կախվածության վերածվել։

Հետազոտողները վերլուծել են Reddit-ում 13-17 տարեկան օգտատերերի ավելի քան 300 գրառում, որոնք տարածվել են Character.AI-ի օգտագործման իրենց փորձով: Շատ դեռահասներ սկզբում դիմում էին չաթբոտներին հուզական աջակցության, միայնության կամ զվարճանքի համար, սակայն ժամանակի ընթացքում նրանց մոտ վարքային կախվածության նշաններ են զարգացել: Որոշ դեպքերում դա հանգեցրել է քնի խանգարումների, դպրոցում առաջադիմության խնդիրների և իրական կյանքում սոցիալական հարաբերությունների վատթարացման։

Գիտնականները նույնականացրել են վարքային կախվածության բոլոր վեց հիմնական բաղադրիչները՝ կարևորություն, չեղարկման համախտանիշ (դեղամիջոցի ընդունման դադարեցման կամ նվազեցման ժամանակ օրգանիզմի արձագանք, որը դրսևորվում է բուժառուի վիճակի վատթարացմամբ -խմբ.), հանդուրժողականություն, կրկնություն (ռեցիդիվ), ընդհարում և տրամադրության փոփոխություն:

Դեռահասները նկարագրել են չաթբոտների նկատմամբ հուզական կապվածությունը, տագնապը, երբ դրանք անհասանելի էին, իսկ դրանց օգտագործումը դադարեցնելու բազմիցս փորձերը, ի վերջո վերադառնալով հավելվածին։

Փորձագետները նշում են, որ արհեստական ​​բանականության ուղեկիցները տարբերվում են նախորդ տեխնոլոգիաներից իրենց ինտերակտիվությամբ, անհատականացմամբ և հուզական կարեկցությամբ, ինչի պատճառով դրանք ընկալվում են որպես հարաբերություններ, այլ ոչ թե գործիքներ։ Դա ավելի դժվարացնում է դրանց օգտագործումից  հրաժարվելը։

Հետազոտությունն ընդգծում է նման համակարգերի ավելի անվտանգ նախագծման անհրաժեշտությունը։ Առաջարկվող միջոցառումները ներառում են օգտագործման ժամանակի մոնիթորինգ, հուզական ստուգումներ, հասանելիության սահմանափակումներ և չաթբոտներից աստիճանաբար հրաժարվելու հարմար եղանակներ։ Շեշտվում է նաև հոգեկան առողջության ոլորտի մասնագետներին ծառայությունների մշակման գործում ներգրավելու կարևորությունը։

Թեև արհեստական ​​բանականության ուղեկիցները կարող են աջակցություն ցուցաբերել, գիտնականները զգուշացնում են, որ առանց պատշաճ սահմանափակումների դրանք կարող են նպաստել անառողջ հուզական կախվածությունների, հատկապես դեռահասների շրջանում։