Գիտնականներն առաջին անգամ ապացուցել են երկվորյակներով հղիության վտանգավոր բարդության ոչ վիրահատական բուժման արդյունավետությունը

Նոր հետազոտությունը ցույց է տվել, որ բարձր ինտենսիվության կենտրոնացված ուլտրաձայնի (HIFU) կիրառմամբ պրոցեդուրան կարող է անվտանգ և ոչ ինվազիվ (առանց վիրահատական միջամտության) մեթոդ  դառնալ ֆետո-ֆետալ տրանսֆուզիայի համախտանիշի (ՖՖՏՀ) բուժման համար։ Այս համախտանիշը միաձվանի երկվորյակներով հղիության հազվադեպ հանդիպող, բայց լուրջ բարդացում է։

Կլինիկական վաղ հետազոտությունը, որին մասնակցել են Մեծ Բրիտանիայից ու Եվրոպայից պացիենտներ և որը ֆինանսավորվել է Մեծ Բրիտանիայի Բժշկական հետազոտությունների խորհրդի (MRC) կողմից, համարվում է աշխարհում առաջին փորձարկումը մարդկանց վրա՝ ՖՖՏՀ-ի վաղ զարգացման փուլում այս ուլտրաձայնային տեխնոլոգիայի կիրառմամբ։ Աշխատանքն իրականացրել են Լոնդոնի Կայսերական քոլեջի և «Imperial College Healthcare NHS Trust» համալսարանական հոսպիտալի հետազոտողները։

Ֆետո-ֆետալ տրանսֆուզիայի համախտանիշը զարգանում է ընդհանուր ընկերք ունեցող միաձվանի երկվորյակներով հղիությունների մոտ 10–15%-ի դեպքում։ Մեծ Բրիտանիայում տարեկան գրանցվում է նման շուրջ 300–400 դեպք։

Այս հիվանդության ժամանակ խախտվում է երկու երեխաների միջև արյան հոսքի հավասարակշռությունը. երկվորյակներից մեկը չափից շատ արյուն է ստանում, իսկ մյուսը՝ ոչ բավարար։ Առանց բուժման՝ այս վիճակը կարող է լուրջ բարդությունների հանգեցնել երկու երեխաների մոտ էլ, ներառյալ՝ օրգանների անբավարարություն, իսկ ամենածանր դեպքերում՝ մեկ կամ երկու երկվորյակների մահ։

Այսօր ՖՖՏՀ-ի բուժման հիմնական մեթոդը ֆետոսկոպիկ լազերային վիրահատությունն է։ Բժիշկները արգանդի մեջ հատուկ բարակ գործիք են մտցնում և լազերի օգնությամբ փակում ընկերքի մակերեսին գտնվող ախտաբանական անոթային կապերը, որոնցով էլ տեղի է ունենում երկվորյակների միջև արյան անհավասարաչափ փոխանակումը։

Չնայած այս պրոցեդուրայի բարձր արդյունավետությանը, այն պահանջում է փոքրիկ կտրվածք մոր որովայնի շրջանում և կարող է վնասել պտղապարկը՝ մեծացնելով հղիության կորստի ռիսկը։

Նոր մեթոդը հիմնված է ուլտրաձայնային հսկողության կիրառման վրա։ Դոպլերային ուլտրաձայնային հետազոտության (ՈւԴՀ) օգնությամբ բժիշկները որոշում են ընկերքի այն մանրագույն անոթները, որոնք միացնում են երկու երեխաների արյան շրջանառությունը։ Այնուհետև արտաքին աղբյուրն ուղղորդում է բարձր էներգիայի ձայնային ալիքներ, որոնք տաքացնում և արգելափակում են այդ անոթները՝ օգնելով վերականգնել արյան հոսքի հավասարակշռությունը։

Հետազոտությանը մասնակցել է 12-ից 17 շաբաթական հղիություն ունեցող 10 կին։ Գիտնականները պարզել են, որ մշակված ընկերքային անոթների 90%-ում պրոցեդուրան թույլ է տվել հաջողությամբ դադարեցնել արյան հոսքը։ Մայրերի և ապագա երեխաների մոտ ոչ մի կողմնակի ազդեցություն չի հայտնաբերվել, իսկ 20 պտղից 18-ը բուժումից երկու շաբաթ անց լիովին առողջ են եղել։