նախընտրելի դարձնել
Աղտոտված օդի ազդեցությունը կարող է կապված լինել երեխաների շրջանում ատոպիկ դերմատիտի ավելի մեծ տարածվածության հետ։ Այս եզրակացությանն են հանգել JAMA Pediatrics ամսագրում հրապարակված հետազոտությունների համակարգված վերլուծության հեղինակները։
Տորոնտոյի համալսարանից Մեգան Պարկի ղեկավարած հետազոտական խումբը վերլուծել է 52 դիտողական հետազոտությունների տվյալներ՝ նվիրված մթնոլորտային օդի աղտոտվածության և ատոպիկ դերմատիտի միջև կապին։ Ատոպիկ դերմատիտը մաշկի քրոնիկական բորբոքային հիվանդություն է, որն ուղեկցվում է քորով, չորությամբ և ցանով։
Արդյունքները ցույց են տվել, որ ազոտի երկօքսիդի խտությանի՝ 10 մկգ/մ³-ով ավելացումը, հավանաբար, կապված է ատոպիկ դերմատիտի պատճառով երեխաների ամբուլատոր բուժման համար դիմելու 3,46 անգամ աճի հետ։ Ծծմբի երկօքսիդի խտության նույն չափով ավելացումը կապված է եղել նման դիմումների թվի 3,96 անգամ աճի հետ։
Հետազոտողները նաև կապ են հայտնաբերել օդում մանր ցրված մասնիկների բարձր խտության և հիվանդության տարածվածության միջև։
Միևնույն ժամանակ, հիվանդության ծանրության և դրա առաջացման ռիսկի վրա օդի աղտոտվածության ազդեցությունն ուսումնասիրող հետազոտությունների արդյունքները եղել են ոչ միանշանակ կամ կայուն կապ չեն հայտնաբերել։
Հեղինակներն ընդգծել են, որ ստացված տվյալները կարևոր նշանակություն ունեն հանրային առողջապահության համար և հաստատում են երեխաների առողջությունը պաշտպանելու նպատակով օդի աղտոտվածության նվազեցման և կլիմայի փոփոխության հետևանքների մեղմման միջոցառումների անհրաժեշտությունը։ Քանի որ վերլուծությունը հիմնված է դիտողական հետազոտությունների վրա, այն բացահայտում է աղտոտվածության և հիվանդության միջև կապը, բայց ինքնին չի ապացուցում, որ հենց աղտոտված օդն է առաջացնում ատոպիկ դերմատիտ։
