Կորած աուտիստ տղայի մայրը դիմել է բախտագուշակներին եւ վստահ է՝ նա ողջ է

Հասմիկ Հարությունյանը՝ կորած աուտիզմով տղայի մայրը, կարծում է, որ իր որդին ողջ է եւ գտնվում է ինչ-որ մարդկանց մոտ, որոնք նրան չեն վերադարձնում պատասխանատվության ենթարկվելու վախից:

Օգոստոսի 10-ին մամուլի ասուլիսի ժամանակ Հասմիկ Հարությունյանը պատմեց, որ եղել է մի քանի աստղագուշակների եւ բախտագուշակների մոտ, եւ նրանք բոլորը մի բանում համակարծիք են՝ իր որդին ողջ է: Նա խոստովանեց, որ հավատում է այդ կանխագուշակություններին, քանի որ որպես մայր ներքուստ նույնն է զգում: Հարությունյանը վարկած առաջ քաշեց, որ իր որդին գտնվում է մեկ կամ մի քանի մարդկանց մոտ, սակայն նրանք վախենում են նրան վերադարձնել՝ քրեական պատասխանատվության ենթարկվելու մտավախություն ունենալով:

«Ես խոստանում եմ, որ բողոք եւ պահանջ չեմ ներկայացնի, որ գործին ընթացք չեմ տա, միայն ինձ վերադարձրեք որդուս»,- ասաց նա՝ դիմելով նրանց, ովքեր, իր կարծիքով, կարող են պահել Հայկ Հարությունյանին:

Տղայի մայրը ուշադրություն դարձրեց այն փաստի վրա, որ իր որդին ընդհանրապես չի խոսում եւ կարող է անծանոթ մարդու մոտենալ՝ գայթակղվելով վառ պիտակներով կամ փաթեթներով: Դրանից բացի, նա ուշադրություն է դարձնում նկարներին եւ նկարազարդումներին, սիրում է, երբ իր համար բարձրաձայն ընթերցում են Աստվածաշունչը:

Միաժամանակ, նրա խոսքով, նա տառապում է աուտիզմի ագրեսիվ ձեւով եւ կարող է անգամ ուժ կիրառել, եթե իրեն ինչ-որ բան դուր չգա: Ագրեսիայի նման դրսեւորումների հետ բախվել է նույնիսկ նրա հայրը: Ըստ որում՝ դեռահասը վախի զգացում չունի, նա ճանապարհի ուղեմասում ոչ մի կերպ չի արձագանքում երթեւեկող ավտոմեքենաներին:

Հարությունյանը տեղեկացրեց, որ որոնողական աշխատանքների սկզբում ոստիկանական շունը իրավապահներին դուրս էր բերել Արարատ տանող ճանապարհ, եւ սրանով էլ նրա որդու հետքերը կտրվում են: Ինչպես նշվեց, մինչեւ հիմա կառչելու ոչ մի բան չկա, ինչը դեռահասի որոնումները դժվարացնում է: «Մենք չգիտենք, թե կոնկրետ որտեղ փնտրենք»,- ասաց նա՝ հավելելով, որ իրավապահ մարմինների հետ մշտական կապ է պահպանում:

Նրա խոսքով՝ Հայկ Հարությունյանը մինչ այդ էլ է տանից փախել, սակայն մի քանի ժամ հետո անպայման վերադառնում էր: 

Ինչ վերաբերում է «Սպանություն» հոդվածով քրեական գործի հարուցմանը, ապա դեռահասի մայրը նշեց, որ այս ընթացակարգը օրենսդրությամբ է նախատեսված, եւ ո՛չ իրեն, ո՛չ իր ընտանիքի մյուս անդամներին ոչ մի մեղադրանք չի առաջադրվել:

Հիշեցնենք, որ Հայկ Հարությունյանը Այնթապ գյուղի իրենց տնից դուրս է եկել հունիսի 8-ին, ժամը մոտ 17։00-ին։ Նա կանաչ վերնաշապիկով է, կիսատաբատով, քայլում է բոբիկ, չի խոսում, մարդկանց հետ շփումներից խուսափում է։ Մինչեւ հիմա տարբեր տեղեկություններ են ստացվել այն մասին, թե նրան որտեղ են տեսել, սակայն այսօրվա դրությամբ որոնողական աշխատանքները անարդյունք են: Հարուցվել է քրեական գործ «Սպանություն» հոդվածով:

Հետևեք NEWS.am Medicine-ին Facebook-ում և Twitter-ում