Բժիշկները պարզել են, ինչու են մարդիկ դժվարությամբ խոսում կանեփ ծխելուց հետո

Իսպանական Քադիսի համալսարանի բժիշկները պարզել են, ինչու են մարդիկ դժվարությամբ խոսում կանեփ ծխելուց հետո: Հետազոտության արդյունքները լույս են տեսել Neuropharmacology ամսագրում, իսկ հոդվածի հակիրճ տարբերակին ծանոթացնում է Daily Mail-ը:

Մասնագետները եկել են այն եզրահանգման, որ խոսելու հետ կապված դժվարություններն ի հայտ են գալիս կանաբինոիդների պատճառով, որոնք կասեցնում են շարժողական նեյրոնների եւ գլխուղեղի միջեւ ազդանշանների փոխանակումը: Բացի այս խնդիրներից, բժիշկների խոսքով, կանաբինոիդները կարող են դժվարացնել շնչառությունը եւ կուլ տալու ռեֆլեքսը:

Իրենց հետազոտությունում բժիշկներն օգտագործել են կանեփի հոգեմետ միացությունների սինթետիկ նմուշները: Մասնագետների պնդմամբ՝ իրենց հետազոտությունում առաջին անգամ է վերլուծության ենթարկվում կանաբինոիդների ազդեցությունը մոտոնեյրոնային ֆիզիոլոգիայի վրա, որը կապված է շարժական ֆունկցիաների եւ մկանային տոնուսի պահպանման հետ:  Ավելի վաղ իրականացված հետազոտություններում ուսումնասիրվել էր միայն կանեփի ազդեցությունը շարժողական համակարգի վրա:

Իրենց գիտափորձն իսպանացի գիտնականներն անցկացրել են Վիստար տեսակի երկու սեռի առնետների վրա: Կանաբինոիդի փոխարեն օգտագործվել է անանդամիդը, ինչպես նաեւ մի շարք այլ միացություններ: Ինչպես նշում են ուսումնասիրության հեղինակները, այս հետազոտությունը հնարավորություն է ընձեռում վերհանել նաեւ կանաբինոիդների՝ նեյրոդեգեներատիվ հիվանդություններով տառապող մարդկանց վրա դրական ազդեցության պատճառները:

Հետևեք NEWS.am Medicine-ին Facebook-ում և Twitter-ում