Գիտնականները կազմել են հպումների համար մարմնի մասերի «հասանելիության քարտեզը»

Ֆինլանդիայի ու Մեծ Բրիտանիայի գիտնականները պարզել են, թե եվրոպական տարբեր երկրներում բնակվող տղամարդիկ ու կանայք իրենց մարմնի որ մասերին դիպչելն են թույլատրելի համարում:

Մասնագետները Մեծ Բրիտանիայի, Ֆինլանդիայի, Ֆրանսիայի, Իտալիայի ու Ռուսաստանի ավելի քան 1.3 հազար կամավորականների խնդրել են մարմնի սխեմատիկ պատկերի վրա ներկել այն մասերը, որոնց թույլ կտային, որ ուրիշները դիպչեն: Հարցման բոլոր մասնակիցները «հպումների քարտեզներ» են կազմել իրենց զուգընկերների՝ ամուսնու կամ կնոջ, ծնողների, եղբայրների, քույրերի, հորեղբայրների ու մորաքույրների, ծանոթների ու անծանոթների համար:

Պարզվել է, որ որքան մտերիմ են հարաբերությունները, այդքան ավելի քիչ են հպումների արգելքները: Էրոգեն գոտիները հասանելի էին միայն սեռական զուգընկերների համար: Կանայք անծանոթ տղամարդկանց համար անմատչելի են համարում իրենց մարմնի գրեթե բոլոր մասերը: Սակայն տղամարդիկ դեմ չեն, որ կինը՝ նույնիսկ անծանոթ, դիպչի իրենց մարմնի որեւէ մասի: Ազգային պատկանելիության խնդիրը հպումների թույլատրելիության հարցում շատ քիչ դեր է կատարում:

«Ստացված արդյունքները վկայում են այն մասին, որ հպումները սոցիալական կապերի պահպանման կարեւոր միջոց են: Քարտեզի կառուցվածքը հստակ պայմանավորված է այն բավականությունով, որը պատճառում են հպումները՝ որքան ավելի հաճելի են հպումները մարմնի այս կամ այն մասին, այդքան ավելի շատ ենք մենք դրանց հասանելիությունը սահմանափակում ուրիշների համար», - նշել է հոդվածի համահեղինակ Յուլիա Սուբիլեխտոն: Հետազոտության արդյունքները ներկայացված են Proceedings of the National Academy of Sciences ամսագրում:

Հետևեք NEWS.am Medicine-ին Facebook-ում և Twitter-ում