Հայաստանի առողջապահության նախարար Լեւոն Ալթունյանը պատրաստվում է կառավարության գործընկերների հետ հրաժարական ներկայացնել: Այս մասին նախարարը հայտարարեց մայիսի 16-ին լրագրողների հետ հանդիպման ժամանակ:
«Ես ինձ քաղաքական գործիչ չեմ համարում, ես վարչարար եմ: Կառավարությունը կոլեգիալ համակարգ է, այդ պատճառով ես պետք է իմ գործընկերների հետ հրաժարական ներկայացնեմ, ինչն էլ կանեմ»,- ասաց նախարարը:
Նրա խոսքով՝ նախարարությունում իր 8 ամսվա աշխատանքի ընթացքում մշակվել են ծրագրեր, որոնց իրականացոումը 3-5 տարվա ընթացքում Հայաստանի առողջապահական համակարգը միանգամայն նոր մակարդակի կբարձրացնեն: Եթե նոր կառավարությունում Լեւոն Ալթունյանը նորից առողջապահության նախարար նշանակվի, իր խոսքով, կշարունակի աշխատել այդ ծրագրերի ուղղությամբ եւ ամեն ինչ կանի՝ դրանք կյանքի կոչելու համար: Իսկ եթե նոր նախարար նշանակվի, դրանք կփոխանցվեն նրան ու նրա թիմին:
Այդ դեպքում Ալթունյանը, իր իսկ խոսքով, հազիվ թե վերադառնա ապահովագրական համակարգ: Նա նշեց, որ մի քանի այլ ծրագրեր կան, որոնց ուղղությամբ մտածում է սկսել աշխատել, սակայն դրանց մասին մանրամասնել չցանկացավ:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր