«Շենգավիթ» ԲԿ-ում բացվել է ինտերվենցիոն ժամանակակից սրտաբանության ծառայություն, արդեն նվազեցվել են նաեւ ստենտավորման գները (ֆոտո)

«Շենգավիթ» ԲԿ-ն համալրել է իր ծառայությունները եւ ավելի քան մեկ ամիս է՝ կենտրոնում ակտիվ գործում է սիրտ-անոթային կենտրոնը, որն արդեն հասցրել է ավելի քան 20 վիրահատական միջամտություն կատարել: Այս մասին NEWS.am Medicine-ի թղթակցի հետ զրույցում հայտնեց կլինիկայի ղեկավար Տիգրան Աստվածատրյանը:

Նրա խոսքով՝ կենտրոնը հագեցած է անհրաժեշտ բոլոր ժամանակակից սարքավորումներով՝ սիրտ-անոթային համակարգի պաթոլոգիաների ճշգրիտ ախտորոշման եւ ինտերվենցիոն սրտաբանության համար: Հիվանդների եւ անձնակազմի համար ստեղծվել է Հայաստանում նախադեպը չունեցող բժշկական կենտրոն՝ անվտանգ եւ հարմարավետ պայմաններով:

«Մեր կենտրոնում կատարվող միջամտությունները սիրտ-անոթային հիվանդությունների, ասել է թե՝ քրոնիկական ոչ ինֆեկցիոն հիվանդությունների բուժման փուլն են: Դա մեզ հնարավորություն է տալիս կանգնեցնել երկար ժամանակ զարգացող հիվանդությունը եւ վերականգնել հիվանդի կյանքի որակը: Մեզ մոտ սրա համար բոլոր հնարավորությունները ստեղծված են»,- ասաց Տիգրան Աստվածատրյանը:

Նրա խոսքով՝ «Շենգավիթ» ԲԿ-ում աշխատանքն իրականացվում է եվրոպական չափորոշիչներին համապատասխան՝՝ Սրտաբանների եվրոպական ասոցիացիայի ուղեցույցների հիման վրա: «Հիվանդանոց մուտքից սկսած եւ վերջացած հիվանդասենյակով՝ մենք ապահովում ենք եվրոպական որակի բժշկական սպասարկում»,- հավաստեց մասնագետը:

Բաժանմունքում իրականացվող ամբուլատոր ծառայությունը ներառում է Էլեկտրասրտագրություն (ԷՍԳ), Էխոսրտագրություն, Հոլտեր մոնիտորինգ (24 ժամյա ԷՍԳ), զարկերակային ճնշման մոնիտորինգ, Էվենտ մոնիտորինգ (սրտխփոցների էպիզոդների գրանցում), ֆիզիկական ծանրաբեռնվածության (Տրեդմիլլ) թեստ եւ սթրես-էխոսրտագրություն, սրտի ռիթմը վարող սարքերի (ՍՌՎՍ) աշխատանքի ստուգում: 

Իսկ ստացիոնար ծառայությունն իրականացնում է`

• սրտի խոռոչների կատետերիզացիա
• սրտի անոթների սելեկտիվ անգիոգրաֆիա (կորոնարոգրաֆիա)
• սրտի անոթների բալոնային անգիոպլաստիկա եւ ստենտավորում
• վերին եւ ստորին վերջույթների մագիստրալ անոթների, գլխուղեղի եւ երիկամների անգիոգրաֆիա
• սրտի էլեկտրաֆիզիոլոգիական հետազոտություններ՝ բոլոր տեսակի ռիթմի խանգարումների դեպքում. այն իրենից ներկայացնում է ներսրտային հետազոտություն՝ սրտի արագ, անկանոն խանգարումներն ախտորոշելու համար:

Հայաստանի Ինտերվենցիոն սրտաբանության առաջատարներից, «Շենգավիթ» ԲԿ-ի սիրտ-անոթային կենտրոնի Ինվազիվ սրտաբանության ծառայության ղեկավար Արամ Նազարյանն էլ NEWS.am Medicine-ի հետ զրույցում հայտնեց, որ հիվանդանոցի տեխնիկական ապահովումը բարձր մակարդակ ունի. բոլոր սարքավորումները նոր են՝ գերժամանակակից, վերջին սերնդի: Դրանք հնարավորություն են տալիս ապահովել ինվազիվ սրտաբանության ամբողջ ծավալը: Բացի այդ՝ բժշկական կենտրոնում իրականացվում է CT անգիոգրաֆիա, որը հավելյալ կարեւոր ինֆորմացիա է ապահովում ճշգրիտ ախտորոշման համար:

«Մեր թիմի պրոֆեսիոնալիզմը բարդ միջամտություններ կատարելու, անոթների բարդ ստենտավորման հնարավորություն է տալիս: ԲԿ-ի նոր մասնաշենքում ստեղծված են հնարավոր իդեալական պայմաններ՝ թե՛ այցելուների, թե՛ հիվանդների եւ թե՛ բժիշկների համար: Հատկապես պետք է նշեմ ինտենսիվ թերապիայի եւ վերակենդանացման բաժանմունքի հագեցվածությունն ու հարմարավետությունը, իսկ հիվանդների խնամքը, բուժսպասարկումը շատ բարձր մակարդակի վրա են: Հիվանդի համար ստեղծված է առավելագույն հարմարավետություն, որ իրեն զգա ինչպես տանը»,- ասաց նա:

Արամ Նազարյանը հայտնեց, որ «Շենգավիթ» ԲԿ-ում նույնպես ստենտավորման գները նվազեցվել են: Ցածր գնի պայմաններում կտրամադրվեն բարձրորակ ծառայություններ. հավաստեց մասնագետը: Սահմանվել են նոր գներ. մեկ դեղապատ ստենտի տեղադրումն արժե 850 հազար դրամ, իսկ յուրաքանչյուր հաջորդի համար վճարվում է լրացուցիչ 400 հազար դրամ, եւ սա տեղադրվելիք ստենտի որակի հաշվին չի կատարվում:

Սիրտ-անոթային կենտրոնի մենեջերը հայտնեց, որ հիվանդների համար մշակվել է հատուկ քարտ՝ գնահատելու այցելուի գոհունակության աստիճանը: Կենտրոնը նախատեսում է նաեւ ակտիվ գիտական գործունեություն իրականացնել՝ արտասահմանցի մասնագետների մասնակցությամբ համաժողովներ, սեմինարներ:

«Շենգավիթ» ԲԿ-ի մասնագետները վերապատրաստվել են Եվրոպական լավագույն կլինիկաներում, եւ սա շարունակական բնույթ է կրելու: 

Հետևեք NEWS.am Medicine-ին Facebook-ում և Twitter-ում