Ինտիմ կյանքում զուգընկերների սխալ սպասումները կարող են ամուսնության մեջ ճակատագրական դերակատարում ունենալ. սեքսոպաթոլոգ

Առավել հաճախ ինչպիսի՞ սեռական խանգարումներ են հանդիպում, ինչպե՞ս պահպանել ներդաշնակությունը ամուսնության մեջ եւ որո՞նք են արական անպտղության զարգացման հավանականության գործոնները՝ այս հարցերի շուրջ է NEWS.am Medicine-ի հարցազրույցը բժիշկ-սեքսոպաթոլոգ Սեւադա Հակոբյանի հետ:

Տղամարդկանց մոտ ինչպիսի՞ սեռական խանգարումներ են առավել հաճախ հանդիպում:

Հայաստանում հաճախելիությունից ելնելով՝ տղամարդկանց շրջանում առավել հաճախ հանդիպում են վաղաժամ սերմնաժայթքումը եւ էրեկտիլ դիսֆունկցիան: Հազվադեպ չեն նաեւ դեպքերը, երբ սեռական խանգարումը զարգանում է սիրտ-անոթային հիվանդությունների, դիաբետի, ավելորդ քաշի, բորբոքային պրոցեսների հետեւանքով:

Ավելի հասուն տարիքում տղամարդկանց մոտ նկատվում է տարիքային անդրոգենային դեֆիցիտ, ինչը բերում է սեռական ցանկության նվազման: Դրանից բացի, հասուն տարիքում սեռական խանգարումներ կարող են առաջանալ սիրտ-անոթային հիվանդությունների, արյան ճնշման, շաքարային դիաբետի դեմ դեղերի ընդունման պատճառով:

Տարիքին զուգահեռ՝         տղամարդկանց մոտ սեռական խանգարումներն ավելի հաճախ են դիտվում, քան կանանց մոտ: Սա պայմանավորված է այն հանգամանքով, որ տղամարդկանց մոտ սոմատիկ խնդիրներն անմիջական ազդեցություն են ունենում սեքսուալության վրա, մինչդեռ կանանց մոտ սեքսուալությունը հիմնականում կապված է հոգեզգայական գործոնի հետ:

Կանայք ինչպիսի՞ սեռական խանգարումներով են Ձեզ ավելի հաճախ դիմում:

Դա հիմնականում անօրգազմիան է կամ հիպոօրգազմիան, սեռական ցանկության նվազումը կամ բացակայությունը, վագինիզմը եւ դիսպարեունիան (ցավ սեռական ակտի ժամանակ):

Չեմ կարող չնշել, որ վագինիզմը ամուսնական կյանքի համար լուրջ վտանգներ է ներկայացնում, եւ որոշ զույգեր կարող են այս խնդիրը տարիներով թաքցնել՝ արդյունքում նորմալ սեռական հարաբերություններ չունենալով: Սա կարելի է կապել սեռական դաստիարակության, վախերի եւ սեռական շփման մասին կեղծ պատկերացումների, ապատեղեկատվության հետ, ինչը հանգեցնում է սեռական ակտի հանդեպ ներքին բացասական վերաբերմունքի:

Անօրգազմիայի մասին խոսելիս նշենք, որ եթե կինը երկար ժամանակ օրգազմ չի զգում, նա սկսում է սեռական հարաբերություններից խուսափել: Սա, իր հերթին, կարող է բերել ընտանեկան-սեռական աններդաշնակության ձեւավորման: Նորմա է համարվում, եթե կինը 50-100 տոկոս սեռական ակտերի ժամանակ օրգազմ է զգում: Եթե այս տոկոսը ցածր է կամ զրոյի է հավասարված, ապա խոսքը պաթոլոգիայի մասին է:

Ամուսնանալուց առաջ որքանո՞վ է կարեւոր սեքսոպաթոլոգի խորհրդատվությունը ստանալ:

Սա մեծ նշանակություն ունի, քանի որ այդ դեպքում նրանք շատ հարցերի պատասխաններ են ստանում: Առաջին հերթին՝ ամուսնանալուց առաջ զույգը կարող է սեռական կյանքից տարբեր սպասումներ ունենալ: Եթե իրական կյանքում սպասումները չեն արդարանում, ապա դա կարող է դառնալ ամուսինների միջեւ լուրջ տարաձայնությունների եւ սեռական կյանքից դժգոհության պատճառ:

Դրանից բացի, գոյություն ունեն շինծու սեռական խանգարումներ, որոնք առաջանում են ապատեղեկատվության գործոնի հետեւանքով: Այս դեպքում զուգընկերներից յուրաքանչյուրը սեռական շփումների հաճախակիության իր պատկերացումն ունի կամ էլ ամուսինները սեռական կառուցվածքի տարբեր տեսակներ ունեն: Սեռական կառուցվածքի ուժեղ տեսակի դեպքում մարդու մոտ սեքսի մեծ պահանջ կա, եւ նրա ամուսնությունը թույլ սեռական կառուցվածքով մարդու հետ կարող է սեռական ցանկություններում աններդաշնակություն առաջացնել:

Նման խնդիրները հնարավոր է հայտնաբերել դեռեւս նախնական փուլում մասնագետի խորհրդատվությանը դիմելով, ինչն ամուսիններին կօգնի խուսափել համանման վիճակներից:

Հետաքրքիր փաստ՝ ընտանիքում սեռական խանգարումները հենց կինն է ավելի արագ հայտնաբերում: Նույնիսկ կողակցին սեքսոպաթոլոգի մոտ ուղարկելու նախաձեռնությունը նրանից է բխում: Նշեմ, որ զույգի միաժամանակյա թերապիան ամենաարդյունավետն է: Տղամարդը կարող է բժշկին հայտնել միայն իր տեսակետը, մինչդեռ կնոջ պարզաբանումները ավելի օբյեկտիվ են լինում, ինչն օգնում է ճիշտ ախտորոշում կատարելուն:

Ամուսնության մեջ կաո՞ղ են ճակատագրական դերակատարում ունենալ ինտիմ կյանքից զուգընկերների սխալ սպասումները:

Հաճախ կինը դժգոհում է, որ ամուսնու հետ ինտիմ կապի իր սպասումները չեն արդարանում: Արդյունքում նրա սեռական պահանջները եւ սպասումները չեն համապատասխանում իրականությանը: Սակայն դրա վրա կարող են ազդել տարբեր գործոններ՝ ամուսինը կարող է աշխատանքով ծանրաբեռնված լինել եւ հոգնել կամ նա ավելի թույլ սեռական կառուցվածք ունի: Կամ էլ տղամարդը նախընտրում է սեռական գգվանքների մի դիապազոն, կինը՝ այլ:

Արդյունքում սա կարող է բերել սեռական աններդաշնակության զարգացման, որը տարիների ընթացքում կխորանա եւ ամուսիններին իրարից կօտարացնի:

Կարելի է ասել, որ երիտասարդ տարիքում պատահում են վագինիզմի, չիրականացված սպասումների եւ այլ պատճառներով առաջացած սեռական խանգարումներ: Ավելի հասուն տարիքում սկսում են գերակշռել սեռական ցանկության բացակայության կամ նվազման պատճառով առաջացող սեռական խանգարումները: Դա կարող են խորացնել կենցաղային խնդիրները:

Վերջերս ԱՄՆ-ում եւ Մեծ Բրիտանիայում հետազոտություն էր անցկացվել, որով հայտնաբերվել էր, որ մարդիկ իրականում գերագնահատում են ուրիշների սեռական կյանքը՝ այն ավելի հագեցած պատկերացնելով, քան իրականում է:

Մեր պրակտիկայում հաճախ ենք դրան հանդիպում: Մարդկանց հաճախ թվում է, որ իրենց սեռական կյանքն իրականում լիարժեք չէ: Նրանք չեն մտածում, օրինակ, որ ընկերները կարող են խաբել՝ պատմելով իրենց ակտիվ սեռական կյանքի մասին:

Մինչդեռ այս ապատեղեկատվությունն ազդում է մարդու սեռական կյանքի վրա. նա սկսում է մտածել, որ մյուս զույգերն ավելի ակտիվ սեռական կյանքով են ապրում, որ նրանք սեռական գգվանքների լայն դիապազոն ունեն: Հաճախ սա դառնում է ծանրագույն սեռական խանգարումների պատճառ:

Նման դեպքերում կարող է օգնել մասնագետի բացատրական աշխատանքը:

Իհարկե, դեպքեր են պատահում, երբ ամուսինները միմյանցից օտարվում են, խուսափում են սեռական շփումներից: Դա հանգեցնում է նրան, որ տղամարդու մոտ սեռական խանգարումները խորանում են, հազվադեպ սեռական շփումների պատճառով վաղաժամ սերմնաժայթքումը սկսում է կրել հաճախակի բնույթ, նվազում է էրեկցիայի որակը:

Սեռական խանգարումներն արդյոք կապվա՞ծ են արական անպտղության հետ:

Իսկապես կապ կա: Տղամարդու համար անպտղության ախտորոշումը ամենասթրեսայիններից մեկն է, ընդ որում՝ այս ֆոնին նրա մոտ կարող են սեռական խանգարումներ զարգանալ: Կամ հակառակը՝ որոշ սեռական խանգարումներն են դառնում անպտղության պատճառը:

Ռիսկի գործոնների թվում կարելի է նշել սեռական հասունացման տարիքում խոզուկով հիվանդանալը, ինչի հետ կապված ծնողները պետք է ուշադրություն դարձնեն երեխաներին ժամանակին պատվաստելու վրա: Դրանից բացի, տղաները 13-14 տարեկանից հետո մասնագետի մոտ պարտադիր պետք է անցնեն ամենամյա կանխարգելիչ հետազոտություններ:

Արական անպտղության դեպքում ռիսկի գործոններ են ավելորդ քաշը, քրոնիկական բորբոքային հիվանդությունները, ալկոհոլի օգտագործումը, ծխելը, վնասակար արտադրությունում աշխատելը:

Հայաստանում, ինչպես ամբողջ աշխարհում, դիտվում է արական անպտղության աճի միտում: Բացառված չէ, որ սա կապված է վատ էկոլոգիայի եւ սխալ սնվելու գործոնի հետ:

Հետևեք NEWS.am Medicine-ին Facebook-ում և Twitter-ում