ՀՀ Առողջապահության նախարարն աշխատանքային այցով Նյու Յորքում է

Առողջապահության նախարար Արսեն Թորոսյանն աշխատանքային այցով Նյու Յորքում է` մասնակցելու ՄԱԿ-ի գլխավոր ասամբլեայի 73-րդ նստաշրջանին: Վերջինիս շրջանակներում սեպտեմբերի 26-ին նախատեսված է տուբերկուլոզին նվիրված ՄԱԿ-ի բարձր մակարդակի հանդիպում, իսկ սեպտեմբերի 27-ին` ոչ վարակիչ հիվանդությունների թեմայով նիստ, որոնց ընթացքում նախատեսված են նախարար Թորոսյանի ելույթները:

Տուբերկուլոզը եւ ոչ վարակիչ մի շարք հիվանդություններ այսօր համաշխարհային նշանակության խնդիր են: Ակնկալվում է, որ հիշյալ հանդիպումը հիմնաքար կհանդիսանա մասնակից երկրների համար` դրանց դեմ պայքարի ակտիվացման, նոր մոտեցումների որդեգրման առումով: Նպատակն է` ընդգծել առաջիկա տարիներին տուբերկուլոզի եւ ոչ վարակիչ հիվանդությունների հակազդմանն ուղղված միջոցառումների կարեւորությունը: ՄԱԿ-ի Գլխավոր ասամբլեային այս հարցերը հնչեցվելու են առաջին անգամ:

Միաժամանակ, այս քննարկումները բացառիկ հնարավորություն են քաղաքական ներգրավվածության եւ արդյունքների մասին միմյանց հաշվետու լինելու համար: Հանդիպման մասնակիցները հնարավորություն կունենան քննարկել հիվանդությունների դեմ գլոբալ պայքարի առաջընթացը, ինչպես նաեւ ուրվագծել հետագա գործողությունները` «Կայուն զարգացում 2030» օրակարգում ներառված 3-րդ` «Ապահովել առողջ կյանք եւ բարեկեցություն բոլորի համար` անկախ տարիքից» նպատակին հասնելու համար:

Միջոցառմանը հրավիրված են մասնակցելու ՄԱԿ-ի անդամ-պետությունների բարձրաստիճան պաշտոնյաներ, դեսպաններ, միջազգային կառույցների եւ հասարակական կազմակերպությունների ներկայացուցիչներ:

Հայաստանյան պատվիրակության կազմում ընդգրկված են առողջապահության բնագավառում ՄԱԿ-ի կառույցների, ինչպես նաեւ տուբերկուլոզի դեմ պայքարի համատեղ ծրագրի հետ աշխատանքները համակարգող նախարարի տեղակալ Լենա Նանուշյանը եւ Տուբերկուլոզի դեմ պայքարի ազգային կենտրոնի տնօրեն Լուսինե Քոչարյանը:

Հետևեք NEWS.am Medicine-ին Facebook-ում և Twitter-ում