Յոթ խորհուրդ, որոնք կօգնեն ձմռանը խուսափել սրտի նոպայից

Ձմռանը սրտի եւ գլխուղեղի կաթվածի զարգացման հավանականությունն աճում է, քանի որ ցուրտ եղանակի պատճառով անոթները նեղանում են, ինչը կարող է առաջացնել արյան մատակարարման լուրջ խնդիրներ:

Ձմռան ցուրտ եղանակը հատկապես վտանգավոր է արդեն իսկ սրտի հիվանդություն ունեցող մարդկանց համար: Ամերիկյան սրտաբանական ասոցիացիայի տվյալներով՝ սրտի իշեմիկ հիվանդությամբ մարդիկ ձմռանը հաճախ են տառապում ստենոկարդիայով (կրծքում ցավ կամ անհարմարավետություն):

Ի՞նչ կարելի է անել ձմռանը սրտի նոպայից եւ այլ խնդիրներից խուսափելու համար:

• Երբ փողոց եք դուրս գալիս, ավելի տաք հագնվեք:
• Խուսափեք գերտաքացումից, քանի որ ձմռանը վտանգավոր է ոչ միայն ցուրտը, այլ նաեւ չափից շատ ջերմությունը. այն կարող է առաջացնել արյունատար անոթների լայնացում եւ նպաստել ճնշման կտրուկ անկմանը, հատկապես սրտի քրոնիկական հիվանդություններով մարդկանց մոտ:
• Աշխատեք խուսափել ալկոհոլից, նիկոտինից եւ կոֆեինից, քանի որ դրանք նեղացնում են արյունատար անոթները՝ նպաստելով սրտի հետ կապված խնդիրների զարգացմանը:
• Պարբերաբար գործածեք տանը պատրաստված տաք ճաշատեսակներ եւ ըմպելիքներ, քանի որ դրանք օրգանիզմին տալիս են ջերմությունը պահպանելու համար անհրաժեշտ էներգիա:
• Տեղյակ եղեք վտանգավոր ախտանշաններին, որոնք կարող են մատնացույց անել սրտի հետ կապված խնդիրները՝ շնչահեղձություն, սրտի անկանոն զարկեր, սրտխառնոց, գլխապտույտ, քրտնարտադրություն, կրծքի, ուսի կամ ծնոտի ցավ: Եթե ձեզ մոտ նկատում եք սիրտ-անոթային հիվանդությունների ախտանշաններ, բժշկին այցելությունը մի հետաձգեք:
• Եթե հազում եք կամ մրսածություն ունեք, հանգստացեք եւ լավ սնվեք:
• Եթե ձեզ մոտ սրտի հիվանդություններ են ախտորոշված, խորհրդակցեք ձեզ բուժող բժշկի հետ եւ հարցրեք, թե որքանով եք վտանգվում ցրտին դուրս գալով, եւ ինչ պետք է անել բարդությունների կանխարգելման համար:

Հետևեք NEWS.am Medicine-ին Facebook-ում և Twitter-ում