Սթենֆորդի համալսարանի գիտնականները հայտնաբերել են, որ երկաթյա նանոմասնիկները, որոնք ստեղծվել են անեմիայի բուժման համար, ակտիվացնում են իմունիտետը եւ նրան ստիպում են ոչնչացնել քաղցկեղային բջիջները:
Հետազոտության հեղինակ Հայկե Դալդրուպ-Լինկը նշում է, որ նանոմասնիկները սովորաբար դիտարկվում են սոսկ որպես դեղերն օրգանիզմ հասցնելու միջոց, բայց իրականում, պարզվել է, դրանք ի վիճակի են հետաքրքրաշարժ էֆեկտներ ստեղծել:
«Մենք շատ զարմացանք, որ այդ նանոմասնիկները մակրոֆագներին ստիպեցին հարձակվել մկան մարմնի ներսում քաղցկեղային բջիջների վրա: Մենք կարծում ենք, որ այդ հնարքն արդյունք կտա նաեւ մարդու օրգանիզմում ուռուցքների բուժման դեպքում», - հայտնել է նա:
Գիտնականներն իրենց բացահայտումը կատարել են ֆերումոկսիտել դեղամիջոցը մշակելիս, որը ստեղծվել է երկաթի նանոմասնիկների հիման վրա: Այն ուղղված է անեմիայի դեմ պայքարին եւ արդեն հավանության է արժանացել ԱՄՆ-ի առողջապահական մարմինների կողմից:
Մակրոֆագները իմունային համակարգի կարեւոր բջիջներ են համարվում. Դրանք օրգանիզմը մաքրում են կենսաաղբից, բակտերիաներից եւ քաղցկեղային բջիջներից:
Այն, որ երկաթի նանոմասնիկներն անսովոր եղանակով են ազդում մակրոֆագների պահվածքի վրա, գիտնականները նկատել են փորձերի ժամանակ, որոնց ընթացքում նանոմասնիկների ազդեցությանն են ենթարկել մկների բջիջների մշակություններ: Դա նրանց մղել է երկաթի նանոմասնիկները քաղցկեղի դեմ պայքարում օգտագործելու մտքին: Իրենց տեսությունը նրանք ստուգել են կրծողների վրա, որոնց մարմնում չարորակ բջիջներ են տեղադրվել:
Մկներին երեք խմբի են բաժանել: Առաջինը երկաթյա նանոմասնիկների ներարկումներ է ստացել, որոնք լցված էին հակաքաղցկեղային դեղամիջոցով, երկրորդին «դատարկ» նանոմասնիկներ են տվել, իսկ երրորդ պոպուլյացիան ծառայել է որպես վերահսկիչ խումբ:
Փորձարկումը ցույց է տվել, որ եւ առաջին, եւ երկրորդ խմբերում նանոմասնիկներն իրենց միանման եղանակով են պահել. նրանք արգելակել են ուռուցքների աճը եւ մակրոֆագերին ակտիվացրել են` պայքարելու քաղցկեղային բջիջների դեմ: Ինչ վերաբերում է վերահսկիչ խմբին, այստեղ իմունային համակարգն ուղղակի անտեսել է ուռուցքը:
Հետագա փորձարկումները ցույց են տվել, որ նանոմասնիկները նաեւ տարբեր օրգաններում մետաստազները կանխարգելելու կարողություն ունեն:
Նախատեսված է ֆերումոկսիտոլի ազդեցությունը, որն արդեն անվնաս դեղամիջոց է ճանաչվել, ապագայում ստուգել քաղցկեղային հիվանդների վրա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր