Գիտնականները բարձր տեխնոլոգիական հագուստ են ստեղծել, որի օգնությամբ կարելի է տեսողության հետ խնդիրներ ունեցող մարդկանց տեղաշարժը ապահովել: Նյու-Յորքում գործող Tactile Navigation Tools ընկերությունը տվիչներով զինված շարժական սարք է մշակել, որը կարող է խոչընդոտներ հայտնաբերել եւ թրթռման միջոցով տեղյակ պահել օգտատիրոջն այդ մասին, հաղորդում է Fox News-ը:
Eyeronman անունը ստացած սարքը կարող է ոչ միայն կույրերի, այլ նաեւ` հրշեջների, զինվորների եւ այլ մասնագետների համար օգտակար լինել:
Պատերազմի ընթացքում հաշմանդամ դարձած մարդիկ, վերջույթների կորստի դեպքում, կառավարությունից թանկարժեք պրոթեզներ են ստանում, մինչ կուրացած վետերանները ստիպված են միայն ձեռնափայտով բավարարվել, հիշեցրել է ընկերության հիմնադիր եւ գլխավոր բժշկական խորհրդատու, Նյու-Յորքի համալսարանի «Լանգոն» բժշկական կենտրոնի վերականգնողական բժիշկ, դոկտոր Ջեյ Ռիցցոն:
15 տարեկանում նրա մոտ խորիոդերեմիա է ախտորոշվել: Դա հազվադեպ պատահող` ցանցաթաղանթի դեգեներատիվ հիվանդություն է, որի արդյունքում տեսողության աննահանջ կորուստ է գրանցվում. հիմա Ռիցցոն գրեթե ոչինչ չի տեսնում: Բժիշկը համոզված է, որ կույր մարդիկ պետք է առավել զարգացած սենսորային պրոթեզներ կրելու հնարավորություն ունենան:
Eyeronman-ը բազմաթիվ սարքերով «հարստացված» շապիկ է` տվիչներ, ինքնագնաց ավտոմեքենաների համար կիրառվող լազերի հիմքով ստեղծված համակարգի` «լիդարի» ճառագայթիչներ, էխոլոկացիայի նպատակով չղջիկների եւ այլ կենդանիների կողմից կիրառվող ուլտրաձային թողարկիչներ եւ որսի հայտնաբերման համար բոժոժավոր օձերի կողմից կիրառվող էլեկտրամագնիսային ճառագայթման տեսակներից մեկը թողարկող համակարգեր:
Համակարգը հիշյալ տվիչներից ստացված ազդանշանը էլեկտրականապես ակտիվ պոլիմերներից պատրաստված հագուստի վիբրացիա է առաջացնում: Օրինակ` եթե խոչընդոտը օգտատիրոջ շապիկից ձախ` ներքեւի մասում է գտնվում, ապա կույր մարդը հենց այդ կողմում էլ վիբրացիա կզգա:
Eyeronman պատենտավորված համակարգը կարող են նաեւ զինվորները կիրառել` մարտական գործողությունների ժամանակ, կամ էլ` ոստիկաններն ու հրշեջները` սահմանափակ տեսադաշտի պարագայում (գիշեր, հրդեհի ու պայթյունի ծուխ):
Նմանատիպ սարքեր մինչ այժմ էլ մշակվել են, սակայն սա առաջին դեպքն է, երբ պլատֆորմն ի վիճակի է հայտնաբերված օբյեկտների մասին տեղեկատվությունը մարմնին հաղորդել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր