Այսօր, հուլիսի 7-ին, Հայաստանի ամերիկյան համալսարանում տեղի է ունեցել «Առողջապահությունը Հայաստանում. կարիքների բացահայտում եւ սփյուռքի դերի սահմանում» խորագրով սեմինար: Սեմինարի զեկուցողը մանկական վիրաբույժ Շանթ Շեխերդիմյանն էր՝ Լոս Անջելեսի Կալիֆոռնիայի համալսարանից (UCLA), իսկ կազմակերպված էր սեմինարը Հայաստանի ազգային մրցունակության հիմնադրամի (ՀԱՄՀ) եւ Հայաստանի ամերիկյան համալսարանի կողմից:
Շանթ Շեխերդիմյանը NEWS.am Medicine-ի թղթակցի հետ զրույցում ասաց, որ սեմինարի հիմնական նպատակն է փնտրել եւ փորձել գտնել ճանապարհներ՝ Հայաստանի առողջապահության ոլորտում սփյուռքի ներգրավվածությունը մեծացնելու համար:
Շանթ Շեխերդիմյանի կարծիքով՝ Հայաստանի առողջապահության ոլորտը բարելավման կարիք ունի, եւ սփյուռքը կարող է օգնել այս հարցում: Սակայն խնդիրն այն է, որ այս պահին երկրում չկա մի համակարգ, որը կօգնի կազմակերպել կապերը Հայաստանի եւ սփյուռքի միջեւ:
Իր զեկույցի ընթացքում բժիշկը այս խնդրի լուծման մի քանի ճանապարհ է առաջարկել, որոնցից է, օրինակ, գաղափարը ստեղծել մի ինստիտուտ, որն ասես միջնորդ կլինի Հայաստանի եւ այլ երկրների միջեւ եւ կօգնի կազմակերպել այդ կապերը: Եթե, օրինակ, լինի մի սփյուռքահայ բժիշկ, ով ցանկանում է իր ներդրումն ունենալ Հայաստանի առողջապահության զարգացման մեջ, նա կարող է դռնեռուռ՝ հիվանդանոցից հիվանդանոց ընկնելու փոխարեն միանգամից դիմել այդ կազմակերպությանը, որը կօգնի գտնել ճանապարհներ՝ այդ բժիշկի պոտենցիալը հնարավորինս էֆֆեկտիվ կերպով օգտագործելու համար:
Հայաստանի ամերիկյան համալսարանի Հանրային առողջության ֆակուլտետի փոխդեկան Վարդուհի Պետրոսյանը NEWS.am Medicine-ի թղթակցին ասաց, որ սփյուռքը իրոք կարող է աջակցել Հայաստանին՝ առողջապահության համակարգի բարելավման գործում՝ Հայաստան բերելով այլ երկրների ավելի կայացած առողջապահական համակարգերի փորձը: Բացի այդ, սփյուռքում կան բազմաթիվ հանրաճանաչ մասնագետներ, ովքեր կարող են իրենց փորձը եւ գիտելիքները բերել Հայաստան:
Հայաստանի ազգային մրցունակության հիմնադրամի բժշկական ծրագրերի ղեկավար Գեւորգ Յաղջյանը NEWS.am Medicine-ի թղթակցի հետ զրույցում նույնպես կարեւորեց սփյուռքահայ մասնագետների մասնակցությունը՝ մեր առողջապահության համակարգի բարելավման հարցերում:
«Մեր նպատակն է ընդգրկել սփյուռքահայերին առողջապահական ռեֆորմների մեջ, տալ հնարավորթյուն, որ նրանք իրենց գիտելիքներն ու ինտելլեկտուալ պոտենցիալը օգտագործեն», - ասաց Գեւորգ Յաղջյանը:
Նա նաեւ նշեց, որ մրցունակության հիմնադրամն արդեն ունի սփյուռքի հետ համագործակցելու շատ հաջողված փորձ, այդ պատճառով, սփյուռքահայության հետագա ընդգրկումն այս ասպարեզում նույնպես շատ լավ գաղափար է:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր