Սիրտ-անոթային հիվանդություններով տառապող մարդիկ ամռանը առավել վտանգված են, քանի որ շոգին նրանց խնդիրները կարող են սրվել, իսկ թաքնված հիվանդությունները՝ ի հայտ գալ: Սրտի իշեմիկ հիվանդություն ունեցող մարդկանց համար շոգ ամառը նույնպես բավական վտանգավոր է:
Ինչու՞: Այս մասին NEWS.am Medicine-ի թղթակցին պատմեց սրտաբան Վահե Սարգսյանը:
Պարզվում է, շոգը անոթների համար սթրեսային գործոն է: Այն կարող է ճնշման անկման կամ կտրուկ բարձրացման պատճառ դառնալ, ինչի հետեւանքով արդեն իսկ ախտահարված սրտամկանը սնուցող անոթները կարող են վնասվել: Այսինքն, ինչպես նշեց սրտաբանը, եթե մարդու մոտ սրտի սնուցման «քաղց» կա, շոգը կարող է նպաստել խնդրի խորացմանը, եւ մարդուն նախաինֆարկտային կամ ինֆարկտային վիճակի հասցնել:
Ինչպե՞ս խուսափել նման խնդիրներից:
Սրտի իշեմիկ հիվանդության առկայության դեպքում բարդություններից խուսափելու համար սրտաբանը խորհուրդ է տալիս ամռանը նախնական հետազոտություն անցկացնել եւ պարզել հիվանդության ծանրությունը, իսկ հետո ադեկվատ բուժում իրականացնել, որը կապահովի սրտի հարաբերական անվտանգությունը:
Բացի այդ, սրտի իշեմիկ հիվանդություն ունեցող մարդկանց, ինչպես նաեւ առողջ մարդկանց, խորհուրդ է տրվում չանել ոչ մի ոչ տրամաբանական բան. օրինակ, շոգ եղանակին արեւի տակ դուրս գալ եւ սինթեթիկ հագուստ կրել խորհուրդ չի տրվում: Դուրս գալիս արժե բաց գույնի գլխարկ կրել եւ օրվա ընթացքում շատ ջուր խմել, եթե չկան հակացուցումներ: Եւ իհարկե, բժիշկը խորհուրդ է տալիս առողջ ապրելակերպ վարել՝ այս բանի համար հակացուցումներ միանշանակ չկան:
Լավ միտք է նաեւ հետեւել NEWS.am Medicine-ի նախորդ խորհուրդներին այն մասին, թե ինչպես պաշտպանվել ամռանը սպառնացող վտանգներից:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր