«Քաջալերիչ խումբ». այց՝ սեքսապաթոլոգի մոտ՝ հայկական եղանակով

Մեր հայրենակիցներից շատերը վախենում են կամ պարզապես չեն սիրում միայնակ բժշկի մոտ այցելության գնալ. շատ հաճախ նրանց բուժհաստատության ընդունարանում «քաջալերիչ խմբի»՝ ընկերների, ծնողների կամ հարազատների ուղեկցությամբ կարելի է տեսնել: Նույնիսկ եթե խոսքը սեքսապաթոլոգի մասին է: Մի խոսքով՝ կարծես թե՝ ազգային մտածելակերպի առանձնահատկության հետ գործ ունենք:

Սեքսապաթոլոգ Սեւադա Հակոբյանը լրագրողներին մի քանի զվարճալի դրվագներ է պատմել՝ իր պրակտիկայից: 

«Անբաժան ընկերներ ենք»

Մի անգամ բժշկի մոտ երիտասարդ տղամարդ էր եկել, բնականաբար՝ ամենահաս ընկերների ուղեկցությամբ:

- Միգուցե լավ կլինի, որ Ձեր ընկերները մեզ մենա՞կ թողնեն, – հարցրել է բժիշկը: – Ի վերջո ինտիմ բնույթի հարցեր ենք քննարկելու…

- Կարիք չկա, – ձեռքը էր թափ տվել երիտասարդը: – Ես իմ ընկերներից ոչ մի գաղտնիք չունեմ:

Դե ինչ արած, ամեն մարդ էլ իր տարօրինակություններն ունի: Սակայն քիչ անց պարզվել էր, որ երիտասարդը լավ էլ գաղտնիքներ ունի, որոնց մասին ընկերները տեղյակ չեն: Այնպես որ հաջորդ անգամ միայնակ էր եկել ու զարմացած հարցրել.

- Բժիշկ, ախր ընկերներիս մոտ ինչո՞ւ էիք նման ինտիմ հարցեր տալիս:

Կարծես ոչ ոք ոչինչ չէր զգուշացրել…

«Նա իմ մասին ամեն ինչ գիտի»

Մի անգամ էլ 40-ամյա տղամարդ էր եկել, ու հետն էլ… մայրիկին բերել: Սեքսապաթոլոգն ավանդական հարցն է տվել.

- Միգուցե մայրիկը մեզ մենա՞կ թողնի: Ինտիմ բնույթի հարցեր կարող են ծագել:

- Չէ, ի՞նչ եք ասում… Մայրս տեղյակ է իմ բոլոր խնդիրներից, – պատասխանն այնքան բնական էր հնչել, կարծես դրանում զարմանալի ոչինչ չկա:

Հետևեք NEWS.am Medicine-ին Facebook-ում և Twitter-ում