Հնարավո՞ր է արդյոք նույնիսկ 90 տարեկանում երիտասարդ եւ առողջ մաշկ ունենալ: Եթե այո, ապա ի՞նչ է պետք անել: Այս հարցերի շուրջ NEWS.am Medicine-ի թղթակիցը մաշկաբան-սեռավարակաբան Հովհաննես Հովհաննիսյանի հետ է զրուցել:
Ծխախոտից հրաժարվել
Ծխախոտի վնասների մասին խոսելիս՝ մասնագետները սովորաբար նշում են դրա ազդեցությունը թոքերի եւ սիրտ-անոթային համակարգի վրա, եւ շատերը մոռանում են, որ ծխախոտը նաեւ մաշկին է վնասում: Ինչպես Հովհաննես Հովհաննիսյանն է նշել, երիտասարդ մաշկ ունենալ ցանկացողները պետք է հրաժարվեն ծխելուց:
Կոսմետիկ միջոցներից խուսափել
Փոշիներից եւ ճարպի մեջ լուծված փոշիներից՝ այսինքն, պուդրայից եւ «տոնալ» կրեմից մասնագետը խորուրդ է տալիս նույնպես խուսափել, քանի որ դրանք ցակնացած մաշկի համար առաջին թշնամին են: Իհարկե, ընդհանրապես դրանցից հրաժարվելը երեւի թե անհնար է, բայց պետք է դրանք գոնե առիթից առիթ օգտագործել:
Ջուր խմել
Մաշկը շատ շուտ է ջրի իր պաշարները կորցնում, չորանում եւ վնասվում է, այդ իսկ պատճառով մաշկաբանը խորհուրդ է տալիս օրվա ընթացքում շատ ջուր խմել:
Խնդրի դեպքում՝ մասնագետի դիմել
Եթե մաշկային ինչ-որ խնդիր կա, ցանկալի է մասնագետի դիմել, ոչ թե սպասել, որ այն ինքն իրեն վերանա: Ինքնաբուժմամբ զբաղվել ցանկալի չէ, քանի որ հետեւանքները կարող են ցավալի լինել:
Խոնավեցնող քսուքներ օգտագործել
Ինչպես Հովհաննես Հովհաննիսյանն է նշել, երկարատեւ հետազոտությունները ցույց են տվել, որ խոնավեցնող քսուքների օգտագործումը մաշկի վրա որեւէ բացասական ազդեցություն չի ունենում, իսկ դրա դրական ազդեցությունն ակնհայտ է:
Երիտասարդ զգալ
Եվ վերջապես, երիտասարդ մաշկ ունենալու համար կինը պետք է իրեն երիտասարդ զգա, պնդում է մաշկաբանը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր