Աշխարհում 275 միլիոնից ավել մարդ տառապում է խլությունից եւ լսողության խանգարումներից, սակայն այս խնդիրներն երբեմն կարելի է կանխարգելել մի շարք պարզունակ միջոցներով:
Քանի որ այսօր մարտի 3-ն է՝ ականջի առողջության եւ լսողության պահպանման միջազգային օրը (International Day for Ear and Hearing), NEWS.am Medicine խմբագրությունը Ձեր ուշադրությանն է ներկայացնում մի քանի հասարակ միջոց, որոնք կօգնեն պահպանել լսողությունը մինչեւ խոր ծերություն:
Հետեւեք Ձեր զարկերակային ճնշմանը
Հետեւեք Ձեր զարկերակային ճնշմանը, քանի որ բարձր զարկերակային ճնշմամբ մարդկանց մոտ շատ հաճախ են զարգանում լսողության հետ կապված խնդիրները (ինչպես նաեւ այլ խնդիրներ): Հիշեցնենք, որ նորմալ ճնշում է համարվում 120/80 ճնշումը: Եթե Ձեզ մոտ այն ավելի բարձր է, մասնագետները խորհուրդ են տալիս նվազեցնել աղի օգտագործումը (քանի որ վերջինս դանդաղեցնում է հեղուկի ելքը օրգանիզմից): Իսկ եթե Դուք ավելորդ քաշ ունեք, փորձեք ազատվել դրանից եւ սկսել ավելի ակտիվ ու առողջ ապրելակերպ վարել: Եթե ինքնուրույն հաղթահարել բարձր ճնշման խնդիրը չի ստացվում, անպայման դիմեք բժշկի:
Հետեւեք արյան մեջ գլյուկոզայի պարունակությանը
Ընդունված է կարծել, որ շաքարային դիաբետով տառապող մարդկանց մոտ լսողության հետ կապված խնդիրները 5 անգամ ավելի հաճախ են հանդիպում, քան առողջ մարդկանց մոտ: Այդ պատճառով այսօր NEWS.am Medicine-ը խորհուրդ է տալիս հետեւել արյան մեջ գլյուկոզայի պարունակությանը եւ խուսափել սթրեսներից, որոնք կարող են հանգեցնել նյութափոխանակության խանգարմանը:
Խուսափեք ակուստիկ վնասվածքներից
Աշխատեք խուսափել ակուստիկ վնասվածքներից: 40 դԲ ուժգնությամբ մշտական աղմուկի գործոնը (սովորական զրույց) աստիճանաբար նվազեցնում է լսողության սրությունը, իսկ 60 դԲ-ից ավել աղմուկը կարող է հանգեցնել ակուստիկ միկրովնասվածքների:
Ականջակալներով երաժշտություն մի լսեք
Աշխատեք որքան հնարավոր է քիչ ականջակալներով երաժշտություն լսել՝ առավելեւս շատ բարձր, քանի որ դա կարող է վնասել ականջների թմբկաթաղանթը՝ մի շարք լուրջ խնդիրներ առաջ քաշելով:
Մի մոռացեք կանխարգելիչ միջոցների մասին
Նախընտրելի է ժամանակ առ ժամանակ զննություն անցնել համապատասխան բժշկի մոտ՝ հիշելով, որ ցանկացած խնդիր շատ ավելի հեշտ է լուծվում, եթե չի հասել բարդացումների փուլին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր