Քնի պակաս ունեցող երեխաներն ավելի են հակված շատակերության եւ ավելորդ քաշ հավաքելուն

Երեխաները, որոնք ավելի քիչ են քնում, քան պահանջում է օրգանիզմը, հակված են շատակերության եւ ավելի հաճախ են ավելորդ քաշ հավաքում, քան նորմալ քնող երեխաները։ Այս մասին հայտարարել են Լոնդոնի համալսարանական քոլեջի բրիտանացի գիտնականները։

Մասնագետները հետազոտության ընթացքում ուսումնասիրել են 5 տարեկան ավելի քան 1000 երեխայի։ Ի թիվս այլ հարցերի՝ գիտնականներին հետաքրքրում էր կուշտ ժամանակ ուտելիքի նկատմամբ երեխաների վերաբերմունքը։ Պարզվել է, որ 11 ժամից պակաս քնած երեխաները անգամ կուշտ ժամանակ չեն կարողանում դիմադրել ուտելիքի գայթակղությանը։ Սննդային խթանների նկատմամբ նրանց արձագանքը 1-5 բալանոց սանդղակով կազմել է 2.53 այն դեպքում, երբ 11-12 ժամ քնած երեխաների մոտ այդ ցուցանիշը կազմել է 2.36 բալ, իսկ 12 ժամ եւ ավել քնող երեխաների մոտ ցուցանիշը եղել է 2.35։

Նախորդ հետազոտությունները նույնպես ցույց էին տվել, որ քնի պակասը էապես մեծացնում է ավելորդ քաշի կամ ճարպակալման հավանականությունը, քանի որ այն մեծացնում է կալորիաների օրաբաժինը։ Մեծահասակների ուղեղի սքանավորման ժամանակ պարզվել էր, որ քնի պակասը գլխուղեղում մեծացնում է ախորժալի սննդի տեսքի հանդեպ մարդու արձագանքման ռեֆլեքսները։

Այս հետազոտությունը հրապարակվել է International Journal of Obesity ամսագրում։

Հետևեք NEWS.am Medicine-ին Facebook-ում և Twitter-ում