Հնդկաստանից սիամական երկվորյակների ծնողները վիրահատության փող չունեն (ֆոտո)

5 փետրվարի, 2016 20:00

Հնդկաստանում սիամական երկվորյակներ են ծնվել, որոնք իրար են միացած փորի հատվածում: Աղջիկներից յուրաքանչյուրը սեփական սիրտ ունի, նորմալ թոքեր եւ առողջ վերջույթներ, նրանց բաժանելը դժվար չէր լինի… եթե նրանց ծնողները վիրահատության փող ունենային:

20-ամյա Մոհինի Սինգհը հիվանդանոց է ընդունվել Հնդկաստանի հյուսիսում` հղիության ութերորդ ամսում, փորի ուժեղ ցավերով: Նրան կեսարյան հատում են կատարել, եւ կինը զարմանքով իմացել է, որ ոչ թե մեկ, այլ երկու աղջիկ է ունեցել: Եվ նրանք իրար են միացած փորի հատվածում: Պարզվել է, որ հղիության ամբողջ ընթացքում նա ոչ մի անգամ չի գնացել գերձայնային հետազոտման. նա եւ ամուսինը դրա համար գումար չունեին:

«Մտքովս չէր անցնի, թե կարող եմ երկվորյակներ ունենալ, այն էլ` սիամական: Հղիությունն ընթանում էր առանց խնդիրների, եւ ես չէի մտածում բժշկին կանոնավոր այցերի մասին: Սիրտս կոտրված է: Նրանք շատ գեղեցիկ են, բայց չգիտեմ, թե ինչքան երկար կապրեն», - ասել է Մոհինին:

Այն կլինիկայի բժիշկները, որտեղ ծնվել են երկվորյակները, նշել են, որ փորի հատվածում իրար միացած սիամական երկվորյակները հազվադեպ են ողջ մնում, բայց այս աղջիկներն առանձին ներքին օրգաններ ունեն, միայն լյարդն է ընդհանուր երկուսի համար. նրանց շանսերը բավականին բարձր են: Բժիշկ Սաշի Գուպտան նշել է, որ ցանկալի է վիրահատությունը կատարել առաջիկա 34 շաբաթվա ընթացքում, այդ դեպքում աղջիկները բավականին բարձր շանսեր կունենան: Ճիշտ է, նման բարդ վիրահատություն կարող են կատարել միայն մայրաքաղաքում եւ դա շատ թանկ արժե:

Աղջիկների հայրն ամսական ընդամենը 50 ֆունտ է աշխատում եւ չի կարող վճարել վիրահատության համար:

«Մենք անհամբերությամբ սպասում էինք մեր առաջին երեխային, բայց չէինք կարող պատկերացնել, որ Աստված կարող է մեզ երկվորյակներ ուղարկել, այն էլ` իրար միացած: Չգիտենք, թե ինչ անենք: Բժիշկներն ասում են, որ աղջիկները կարող են ողջ մնալ, եթե նրանց առաջատար կլինիկա տեղափոխենք, բայց ես դրա համար գումար չունեմ: Ես չեմ թողնի իմ երեխաներին եւ հոգ կտանեմ նրանց, ինչքան որ դիմանան: Չգիտեմ, կառավարությունը կարո՞ղ է օգնել ինձ նման աղքատին», - ասել է երեխաների հայրը: