Հայաստանում Հնդկաստանի դեսպան Սուրեշ Բաբուն «Մուրացան» համալսարանական հիվանդանոցային համալիրին դեղամիջոցներ է նվիրաբերել տալասեմիայով տառապող երեխաների բուժման համար:
Ինչպես նվերն ընդունելիս նշել է համալիրի տնօրեն Բագրատ Բավեյանը, սա Հայաստանում Հնդկաստանի դեսպանատան միակ բարեգործական ակցիան չէ հիվանդ երեխաներին օգնելու նպատակով: Ավելի վաղ Սուրեշ Բաբուն «Մուրացան» կլինիկային դեղամիջոցների եւս մեկ խմբաքանակ էր նվիրել, ինսչպես նաեւ իր անձնական միջոցներից գումար է փոխանցել «Մուրացան» հիմնադրամին:
Հայաստանի առողջապահության փոխնախարար Սերգեյ Խաչատրյանը նշել է, որ այսօրվա ակցիան հայ-հնդկական ջերմ հարաբերությունների ուղղակի վկայությունն է: Նրա խոսքով, պարոն Բաբուի Հայաստանում գտնվելու տարիների ընթացքում այդ հարաբերություններն ավելի են ամրապնդվել:
Նա նշել է, որ առողջապահության ոլորտում Հնդկաստանի հետ մի քանի հեռանկարային ծրագիր է իրականացվում, որոնցից մեկը Հայաստանի մարզերում իրականացվող հեռաբժշկության նախագիծն է, որի համար հնդկական կողմը տրամադրել է անհրաժեշտ բոլոր սարքավորումները:
Սերգեյ Խաչատրյանն ափսոսանք է հայտնել այն առումով, որ Սուրեշ Բաբուն արդեն թողնում է իր պաշտոնը, բայց ավելացրել է, որ պայմանավորվածություն կա, որ նա Հայաստան կգա մասնավոր այցերով:
Ինքը` դեսպանը, իր ելույթում նշել է, որ այս նվիրատվության կարեւորությունը նրա արժեքը չէ եւ որ դա համեստ ներդրում է հիվանդ երեխաների բուժման գործում: Նա նշել է, որ դեղերը Հայաստանի համար անվճար տրամադրել է Cipla դեղագործական ընկերությունը, որը մտնում է Հնդկաստանի խոշորագույն դեղ արտադրողների եռյակի մեջ: Դեսպանի խոսքով, Cipla ընկերությունը միշտ օգնում է նրանց, ովքեր դեղերի կարիք ունեն աշխարհի տարբեր երկրներում, ընկերության քաղաքականությունն ու փիլիսոփայությունն է այդպիսին. ոչ մի հիվանդ առանց դեղի չպիտի մնա: Սուրեշ Բաբուն հավելել է, որ ընկերությունը դեղամիջոցները Հայաստան է ուղարկել իր մի հեռախոսազանգից հետո:
Երեւանի Բժշկական համալսարանի ռեկտոր Միքայել Նարիմանյանը Հնդկաստանի դեսպանին եւ Cipla դեղագործական ընկերությանը շնորհակալություն է հայտնել ոչ թե կոնկրետ նվիրատվության համար, այլ այն փիլիսոփայության, որ բերում են մեր կյանք:
Նշենք, որ տալասեմիան ժառանգական բնույթի հիվանդությունների մի ամբողջ խումբ է: Դրանք բնութագրվում են նորմալ հեմոգլոբինի սինթեզի գործընթացի խանգարմամբ: Տալասեմիան կարելի է նաեւ սակավարյունության հազվագյուտ տեսակ համարել, որի դեպքում դիտարկվում է արատավոր հեմոգլոբինի առկայություն: Տալասեմիայի պատճառը գենետիկական խանգարումներից առաջացած ժառանգականությունն է:
Բուժումը տալասեմիայից ամբողջական առողջացում չի բերում: Իսկ բուժական մեթոդիկայի էությունը սակավարյունության շտկումն է էրիտրոցիտային զանգվածի ներարկման միջոցով: Կիրառվում են նաեւ այնպիսի դեղամիջոցներ, որոնք օրգանիզմից հանում են երկաթի ավելցուկը: Հենց նման դեղամիջոցների թվին է դասվում Cipla Limited ընկերության Kelfer (500 mg) (Deferiprone) դեղամիջոցը:
Լուսանկարները՝ Արսեն Սարգսյանի
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր