Կես սրտով ծնված երեխան բարդ վիրահատության է ենթարկվել (ֆոտո)

Միշել Էսլինն ու նրա ամուսինը՝ Լին, երկար ժամանակ երազում էին երկրորդ երեխայի մասին, բայց չէր հաջողվում արդյունքի հասնել: 6 տարի անց երկար սպասված հղիությունը, վերջապես, հաջողվու է, սակայն շուտով զույգի երջանկությունը մթագնում է. ուլտրաձայնային հետազոտությունը ցույց է տալիս, որ ապագա երեխայի սիրտը սխալ է ձեւավորվում:

Բժիշկները պտղի մոտ սրտի ձախ բաժնի հիպոպլաստիկ սինդրոմի նախանշաններ են տեսնում եւ ծնողներին խորհուրդ են տալիս ընդհատել հղիությունը, քանի որ փոքրիկի ապրելու հավանականությունը 50%-ից ավելի չէ եւ, լավագույն դեպքում, ծնվելուց անմիջապես հետո հարկ կլինի երեք բարդ վիրահատություն կատարել: Բայց նույնիսկ այդ դեպքում ոչ ոք չէ կարող երաշխավորել, որ վիրահատական միջամտությունից հետո երեխան կապրի մինչեւ դեռահասության տարիքը: Լին եւ Միշելը, սակայն, որոշում են չընդհատել հղիությունը:

Տղան, որին Ռեգգի են կոչել, ծնվել է սեպտեմբերի 1-ին եւ չորս օր անց առաջին վիրահատությանը ենթարկվել: 9 ժամ տեւած սրտի բաց վիրահատության ընթացքում մասնագետները նրա սրտի աշխատող հատվածին են փոխանցել չաշխատող մասի ֆունկցիաները: Ե՛վ ծնողները, ե՛ւ բժիշկները մի քանի ամիս շարունակ մտավախություն ունեին Ռեգգիի կյանքի համար, սակայն փոքրիկը, պարզվեց, ավելի պինդ է, քան սպասում էին: Եվ չնայած նախապես որոշված էր նրան 3-4 ամիս հիվանդանոցում պահել, բայց 6 շաբաթ անց արդենե ծնողներին թույլ են տվել նրան տուն տանել: Մյուս վիրահատություններն ավելի ուշ կարվեն:

Միշել Էսլինը պատմել է, որ ուրախ են հիվանդանոցից դուրս գրվելու, բայց հատկապես այն բանի համար, որ Սուրբ Ծննդյան տոնին Ռեգգին ընտանիքի հետ է լինելու: Նա նաեւ հույս է հայտնել, որ ապագայում նոր տեխնոլոգիաներ եւ բուժման մեթոդներ ի հայտ կգան եւ կկարողանան օգնել Ռեգգիին:

Հետևեք NEWS.am Medicine-ին Facebook-ում և Twitter-ում