Գիտնականները հայտնաբերել են մերսման արտասովոր հատկությունը

Նորթումբրիի համալսարանի հետազոտողները Բրիտանական հոգեբանական միության ամենամյա համաժողովում զեկույց են ներկայացրել, որում նշված է, որ մերսումը կարող է լավ միջոց դառնալ զուգընկերոջ հետ մտերմանալու եւ ընտանեկան հարաբերություններն ամրապնդելու համար: Փոխադարձ մերսումն ազդում է զուգընկերներից յուրաքանչյուրի եւ ընդհանրապես նրանց հարաբերությունների վրա, եզրակացրել են գիտնականները:

Մասնագետները փորձերի շարք են անցկացրել 38 զույգերի մասնակցությամբ: Նրանք փորձարկվողներին խնդրել են շաբաթական առնվազն 2 անգամ 15 րոպե միմյանց մերսել: Մերսումը սեքսուալություն չի ներառել՝ զուգընկերներն այն կատարել են հագնված:

Մի քանի շաբաթ հետո հետազոտողները վերլուծել են փորձերի մասնակիցների էմոցիոնալ եւ ֆիզիկական վիճակի մակարդակը եւ պարզել, որ մարդիկ սկսել են իրենց ավելի հանգիստ, երջանիկ զգալ եւ իրենց հարաբերություններից գոհ լինել: Ըստ որում՝ բարելավվել է ոչ միայն նրանց հոգեբանական, այլ նաեւ ֆիզիկական ինքնազգացողությունը:

«Մերսումը կարող է զույգերի հարաբերությունների բաելավման պարզ, հասանելի եւ արդյունավետ միջոց լինել: Մեր հետազոտությունից հետո 91 տոկոսը հայտարարել է, որ ուրիշներին էլ խորհուրդ կտա փոխադարձ մերսում կատարել, իսկ 74 տոկոսը շարունակել է մեկը մյուսին մերսել նաեւ նախագծի ավարտից հետո»,- ստացած արդյունքներն են ներկայացրել հետազոտության հեղինակները:

Հետևեք NEWS.am Medicine-ին Facebook-ում և Twitter-ում