Ծնողները ցանկանում են Չարլի Գարդին հիվանդանոցից տանել, որպեսզի փոքրիկը տանը մահանա

Մահացու հիվանդ 11 ամսական տղայի՝ Չարլի Գարդի ծնողները՝ Քրիս Գարդն ու Քոննի Յեյթսը, դիմել են Լոնդոնի Բարձր դատարան, որպեսզի իրենց որդուն տուն տանելու թույլտվություն ստանան: Նրանց կարծիքով՝ հենց այնտեղ պետք է փոքրիկն անցկացնի կյանքի վերջին ժամերը:

Great Ormond Street Hospital (GOSH) կլինիկայում, որտեղ ներկայում գտնվում է տղան, մտավախոթյուն են հայտնել այդ կապակցությամբ: Լոնդոնյան հիվանդանոցի աշխատակիցները ծնողներին թույլ չեն տալիս երեխային տուն տանել, հայտարարել է ընտանիքի փաստաբան Գրանտ Արմսթրոնգը:

«Մենք պայքարում ենք խոչընդոտների դեմ, որոնք ստեղծում է հիվանդանոցը ծնողների ճանապարհին: Նրանք Չարլիի կարճ կյանքի ավարտից առաջ միասին կարճ ժամանակ անցկացնելու հույս ունեն»,- Լոնդոնի Բարձր դատարանի նիստում հայտարարել է Արմսթրոնգը:

Բժիշկները պարզաբանել են, թե ինչու դա հնարավոր չէ: Նրանք նշել են, որ տղան թոքերի արհեստական օդափոխման սարքավորման կարիք ունի: «Չարլիին հատուկ խնամք է անհրաժեշտ, որն անհնար է պարզեցնել»,- նշել են բուժհաստատության ներկայացուցիչները:

Լոնդոնի Բարձր դատարանը ծնողների հայցով վերջնական որոշում կկայացնի այսօր՝ հուլիսի 26-ին:

Չարլի Գարդի գործը լայն արձագանք է ստացել այն բանից հետո, երբ բրիտանական դատարաններն ու Մարդու իրավունքների եվրոպական դատարանը որոշում են կայացրել երեխային արհեստական շնչառության եւ կենսապահովման սարքերից անջատելու մասին:

Սակայն Չարլիի ծնողները՝ Քոննի Յեյթսն ու Քրիս Գարդը, մինչեւ վերջին պահը դեմ էին այդ որոշմանը ու ուզում էին շարունակել տղայի բուժումը: Նրանք նվիրատվություններով շուրջ 1.3 մլն ֆունտ էին հավաքել, ԱՄՆ-ում որդու փորձարարական բուժումը կազմակերպելու համար: Նրանք նաեւ օգնության խնդրանքով դիմել էին Հռոմի Պապին: Երեխան հազվագյուտ անբուժելի գենետիկ հիվանդություն ունի՝ միտոքոնդրիալ ԴՆԹ-ի քայքայման համախտանիշ:

Նախօրեին հայտնի էր դարձել, որ Յեյթսն ու Գարդը հետ են կանչել իրենց որդուն բուժման նպատակով ԱՄՆ ուղարկելու դիմումը՝ այդպիսով փաստացի դադարեցնելով տղային բուժելու իրավունքի համար դատական գործը:

Հետևեք NEWS.am Medicine-ին Facebook-ում և Twitter-ում